Paragvay Respublikası Prezidenti Santyago Penya 11-dekabr kúni rásmiy sapar menen mámleketimizge keldi.

Joqarı mártebeli miymandı “Tashkent-Xumo” xalıqaralıq aeroportında Ózbekstan Respublikası Bas ministriniń orınbasarı Jamshid Qwchqorov hám basqa da rásmiyler kútip aldı.

Kóksaray rezidenciyasında Paragvay Respublikası Prezidenti Santyago Penyanı kútip alıw máresimi boldı.
Bul jerde Ózbekstan Respublikası Prezidenti Shavkat Mirziyoev hám Paragvay Respublikası Prezidenti Santyago Penya rásmiy delegaciyalardıń qatnasıwında sóylesiw ótkerdi.
Ózbekstan menen Paragvay arasındaǵı ámeliy birge islesiwdi bunnan bılay da bekkemlew perspektivaları dodalandı.
Ózbekstan jetekshisi Paragvay basshısın qızǵın qutlıqlap, Latın Amerikası mámleketi Prezidenti tárepinen Ózbekstanǵa birinshi márte ámelge asırılıp atırǵan bul sapar etiw tariyxıy áhmiyetke iye ekenin atap ótti. Bul sammit eki mámleket arasındaǵı doslıq qatnasıqlardı rawajlandırıwda jańa dáwirdi baslap beretuǵını atap ótildi.
Sóylesiwlerde eki tárepleme birge islesiwdi, sonıń ishinde, sawda-ekonomikalıq, mádeniy-gumanitarlıq, bilimlendiriw hám basqa da tarawlarda keńeytiwdiń tiykarǵı baǵdarları dodalandı.
Óz-ara sawdanı kóbeytiw, isbilermenlik baylanısların rawajlandırıw, awıl xojalıǵı, azıq-awqat hám ximiya sanaatı, sanlastırıw, turizm hám sport tarawlarında birgeliktegi joybarlardı ámelge asırıwǵa ayrıqsha itibar qaratıldı.
Xalıqaralıq hám regionallıq kún tártibindegi áhmiyetli máseleler boyınsha da pikir alısıldı.
Ushırasıw juwmaǵında tárepler siyasiy sóylesiwdi bunnan bılay da rawajlandırıw hám óz-ara paydalı tarawlarda ámeliy birge islesiwdi tereńlestiriwge tayar ekenin tastıyıqladı.
Bolıp ótken sóylesiwlerdiń juwmaǵında Ózbekstan Respublikası Prezidenti Shavkat Mirziyoev hám Paragvay Respublikası Prezidenti Santyago Penya Birgeliktegi bildiriwge qol qoydı.
Sonday-aq, jetekshiler janında Ózbekstannıń JSShǵa qosılıwı sheńberinde bazarǵa kiriw máseleleri boyınsha eki tárepleme sóylesiwlerdiń juwmaqlanǵanı haqqındaǵı protokol jáne Sırtqı isler ministrlikleri arasında siyasiy másláhátlesiw mexanizmin jolǵa qoyıw haqqında óz-ara túsinisiw memorandumına qol qoyıw máresimi ótkerildi.
Ózbekstan menen Paragvay arasındaǵı joqarı dárejedegi sóylesiwler juwmaqlanǵannan soń, Kóksaray rezidenciyasında terek egiw máresimi bolıp ótti.
Mámleketlerimiz hám xalıqlarımız arasındaǵı doslıq hám sheriklikti bekkemlewge, eki tárepleme qatnasıqlar tariyxında jańa bet ashıwǵa óz-ara isenimli umtılıstıń belgisi sıpatında Prezidentler Shavkat Mirziyoev hám Santyago Penya birgelikte Húrmetli miymanlar qıyabanında terek ekti.
Paragvay Respublikası Prezidenti Santyago Penyanıń Ózbekstanǵa rásmiy saparı dawam etpekte.

Z.JONIBEKOV,
ÓzA xabarshısı