Oliy Majlis Senatına “BMSh-hayal-qızlar” strukturasınıń Evropa hám Oraylıq Aziya mámleketleri boyınsha regionallıq direktorı Belen Sans Luke keldi.

Senat Baslıǵı Tanzila Norboeva menen ushırasıwda Ózbekstannıń “BMSh-hayal-qızlar” strukturası menen birge islesiwi, sonday-aq, Ózbekstanda gender teńlikti támiyinlew jáne hayal-qızlardıń huqıqları menen imkaniyatların keńeytiw boyınsha keyingi qádemler dodalandı.
Hayal-qızlardıń huqıqların qorǵaw baǵdarında keń kólemli reformalar ámelge asırılıp atırǵanı atap ótildi. Barlıq tarawlarda gender teńlikti támiyinlew baǵdarında ámelge asırılıwı zárúr bolǵan sistemalı jumıslar dodalandı. Sonıń ishinde, sud-huqıq tarawında da hayal-qızlardıń belsendiligin arttırıw, gender teńlikti támiyinlewde belsendi bolǵan shólkemler menen uyımlardı qollap-quwatlaw boyınsha pikir alısıldı.
Ushırasıw waqtında sheriklikti bekkemlew hám birgeliktegi joybarlardı keńeytiwde áhmiyetli qádem bolǵan Tashkent qalasında “BMSh-hayal-qızlar” strukturası ofisiniń ashılıwına joqarı baha berildi.
BMSh Hayal-qızlar statusı boyınsha komissiyasınıń 70-sessiyasına qatnasıw, sonday-aq, Oraylıq Aziya mámleketleri jetekshi hayal-qızlarınıń sóylesiwinde birge islesiw máseleleri kórip shıǵıldı.
Ushırasıw juwmaǵında tárepler birge islesiwdi jáne de bekkemlew, hayal-qızlardı qollap-quwatlaw hám gender teńlikti rawajlandırıwǵa qaratılǵan birgeliktegi baslamalardı ámelge asırıwǵa kelisip aldı.

N.Abduraimova, ÓzA