Jáhán ekonomikası hám diplomatiya universitetinde belgili siyasattanıwshı, senator hám Ózbekstan Kásiplik awqamları Federaciyasınıń baslıǵı Qudratilla Rafiqovtıń “Jańa Ózbekstan: Shavkat Mirziyoev jolı” kitabınıń inglis tilindegi basılımınıń prezentaciyası bolıp ótti.

Ilaj aldınan Ózbekstan Respublikasınıń mámleketlik gimni jańladı.
Onda mámleketlik uyımlar, diplomatiyalıq korpus wákilleri, ilimiy toparlar hám ǵalaba xabar qurallarınıń xızmetkerleri qatnastı.
Ilajdı Oliy Majlis Senatı Baslıǵınıń birinshi orınbasarı, Jáhán ekonomikası hám diplomatiya universitetiniń rektorı Sodiq Safoev kiris sóz benen ashtı.
Atap ótilgenindey, bul kitap mámlekettiń strategiyalıq rawajlanıw baǵdarın hár tárepleme tallap, siyasiy, ekonomikalıq hám sociallıq tarawlardaǵı tereń ózgerislerdi sáwlelendirip beredi. Onda ekonomikanı erkinlestiriw, puqaralıq jámiyetin bekkemlew, insan huqıqların qorǵaw hám Ózbekstannıń xalıqaralıq processlerde belsene qatnasıwshı sıpatındaǵı rolin kúsheytiw máselelerine ayrıqsha itibar qaratılǵan.
– Basılımnıń inglis tilindegi talqılawı álleqashan xalıqaralıq kólemde keńnen tán alınǵan, – dedi “Ishonch” gazetasınıń bas redaktorı H.Ermatov. – Aldın bul kitaptıń prezentaciyaları Vashingtonda – AQSh Kongressi imaratında, sonday-aq, BMShtıń Nyu-Yorktaǵı bas rezidenciyasında tabıslı ótkerilgen edi. Bul waqıyalar sırt elli qánigeler, siyasatshılar hám diplomatlar arasında úlken qızıǵıwshılıq oyatıp, Jańa Ózbekstannıń kelbetin jáhán maydanında jáne de ǵalaba en jaydırıwǵa xızmet etpekte.
“Jańa Ózbekstan: Shavkat Mirziyoev jolı” – mámlekettegi ózgeris processlerin tolıq sáwlelendiretuǵın fundamental shıǵarma bolıp esaplanadı. Basılım sırt elli kitapqumarlarǵa mólsherlengen bolıp, olarǵa respublikamızda ámelge asırılıp atırǵan reformalardıń maqseti, mánisi hám nátiyjelerin tereńirek ańlaw imkaniyatın beredi.
– Búgingi globallasıw dáwirinde Ózbekstannıń jańa rawajlanıw jolı xalıqaralıq jámiyetshilikte úlken qızıǵıwshılıq oyatpaqta, – deydi Sırtqı isler ministriniń birinshi orınbasarı B.Aloev. – Inglis tilindegi basılım sırt elli siyasatshılar, ilimiy toparlar hám xalıqaralıq shólkemler ushın mámleketimizdegi reformalardı tereńirek ańlaw imkaniyatın beredi. Shıǵarmada siyasiy sistemanı modernizaciyalaw, ekonomikanı liberallastırıw, insan huqıqların qorǵaw, sud-huqıq tarawındaǵı ózgerisler, sonday-aq, Ózbekstannıń xalıqaralıq maydandaǵı jańa imidji haqqında tolıq maǵlıwmat berilgen. Ózbekstan búgin jańa basqıshqa qádem qoydı. Ashıq-aydınlıq, rawajlanıw hám insan qádiri ústin bolǵan jámiyetke umtılmaqta. Kitap mine usı ózgerislerdiń kórinisin hám logikasın keń jámiyetshilikke jetkeriwdi maqset etedi.
Bul ilaj tek ǵana jańa basılımnıń prezentaciyası emes, al Ózbekstannıń zamanagóy rawajlanıw jolın dúnyaǵa tanıtıwda áhmiyetli qádemlerden biri boldı.

ÓzA