Kúni keshe qabıl etilgen húkimet qararı menen “Ekoaymaqlarda turistlik soqpaqlardı shólkemlestiriw hám olardan paydalanıw tártibi haqqında”ǵı reje tastıyıqlandı.

Reje mámleketlik qorıqxanalardıń bufer zonaları, milliy tábiyat baǵları, pitomnik, toǵay hám toǵay-ań xojalıqları, tawlı hám shól aymaqlarında (ekoaymaqlar) turistlik soqpaqlardı shólkemlestiriw tártibin belgileydi.
Rejege bola, balansta saqlawshı turistlik soqpaqtı shólkemlestiriw ushın tiyisliligi boyınsha Turizm komitetiniń aymaqlıq bólimine arza menen múrájat etedi. Arzaǵa turistlik soqpaq haqqında maǵlıwmatnama, kartası, foto hám video kórinisler qosımsha etiledi. Arza kelip túsken kúnnen baslap 10 jumıs kúni ishinde kórip shıǵıladı.
Aymaqlıq bólimshe turistlik soqpaqtıń belgilengen talaplarǵa juwap beriwin ornına shıqqan halda úyrenip shıǵıp, nátiyjesi boyınsha 2 nusqada akt dúzedi.
Turizm komiteti aymaqlıq bólimshesi tárepinen jiberilgen hújjetlerdi 2 jumıs kúni ishinde kórip shıǵıp, turistlik soqpaqtı Turistlik soqpaqlardıń birden-bir reestrine kirgizedi. Birden-bir reestrge kirgizilgen turistlik soqpaqlar shólkemlestirilgen bolıp esaplanadı.
Balansta saqlawshı turistlik soqpaq reestrge kirgizilgen kúnnen baslap 1 ay ishinde onıń kiriw ornında pasportın hám kartasın jáne belgilengen málimleme belgilerin ornatadı.

M.Komilova, ÓzA