Túrkiy mámleketler shólkemine aǵza mámleketler energetika tarawında birge islesiwdi rawajlandırıw, turaqlı hám qáwipsiz energiya támiynatına ayrıqsha itibar qaratpaqta.

Kúni keshe Stambulda ótkerilgen Túrkiy mámleketler shólkemine aǵza mámleketler Energetika ministrleriniń V májilisi usınday birge islesiw baylanısların bekkemlew hám “jasıl” energetika joybarların alǵa qoyıw imkaniyatların dodalaw ushın áhmiyetli platforma boldı.
Onda Ózbekstan, Túrkiya, Qazaqstan, Qırǵızstan, Túrkmenstan hám Ázerbayjan Respublikası Energetika ministrleri, Túrkiy mámleketler shólkeminiń bas xatkeri jáne Vengriya hám Arqa Kipr Sırtqı isler ministrleri baqlawshı sıpatında qatnastı.
Ushırasıw dawamında dos hám tuwısqan túrkiy mámleketler basshılarınıń baslamaları menen barlıq tarawlar qatarında janılǵı-energetika tarmaǵın rawajlandırıw jolında birge islesiw baylanısları jańa basqıshqa shıǵıp atırǵanı aytıp ótildi.
Májiliste energetika tarawındaǵı birge islesiwdi bunnan bılay da rawajlandırıw, regionnıń energetika qáwipsizligin támiyinlew hám turaqlı energiya dereklerin engiziwdegi tiykarǵı baǵdarlar dodalandı. Atap aytqanda, “jasıl” energetika joybarların qollap-quwatlaw, tarmaqlardıń integraciyası hám jańa investiciyalıq joybarlardı ámelge asırıw máselelerine ayrıqsha itibar qaratıldı.
Birge islesiw máselesi Túrkiy mámleketler shólkemi ushın strategiyalıq áhmiyetke iye bolıp, ol tek ǵana siyasiy hám ekonomikalıq tarawlarda emes, al energetika tarmaǵınıń rawajlanıwında da óz nátiyjesin kórsetip atırǵanın atap ótiw kerek. Energetika tarawındaǵı birgeliktegi baslamalar, jańa investiciyalıq joybarlar hám “jasıl” energetika ilajları regionda turaqlılıq hám qáwipsizlikti támiyinlewde áhmiyetli rol atqaradı. Sonıń menen birge, tarmaqlardıń integraciyası hám innovaciyalıq texnologiyalardı engiziw mámleketler arasındaǵı isenimdi bekkemlep, energiya támiynatında úzliksizlik hám nátiyjelilikti támiyinleydi.
Ministrliktiń málimleme xızmetiniń xabarına bola, ushırasıw juwmaǵında tárepler Túrkiy mámleketler shólkemi Energetika ministrleriniń gezektegi – VI májilisin 2026-jılı Ózbekstanda ótkeriwge kelisip aldı. Bul ilajlar bolsa regiondaǵı energetika birge islesiwin bekkemlew hám turaqlı rawajlanıw jolında áhmiyetli qádem bolıp esaplanadı.

N.Ziyodullaeva,
ÓzA