Mádeniy miyras agentligi tariyxıy estelikler hám muzeylerge turistler aǵımın kóbeytiw hám xızmetler kólemin keńeytiwge qaratılǵan Húkimet qararınıń joybarın islep shıqtı.

Bul hújjet Ózbekstanda mádeniy miyras hám muzeyler tarawın jáne de rawajlandırıw, mádeniy miyras obektleri hám muzeylerge kiriw biletlerin sanlastırıw hám aldınnan satıp alıw imkaniyatın jaratıw, mádeniy miyras obektleri hám muzeylerge keliwshi turistlerdiń aǵımın keskin arttırıw, sonday-aq, jańa zamanagóy texnologiyalardı qollanǵan halda muzeyler tarawın rawajlandırıwǵa xızmet etiwi kerek.
Hújjet joybarına bola, mámleketlik muzeyler hám mádeniy miyras obektlerine “virtual sayaxat” etiw imkaniyatın beretuǵın baǵdarlama islep shıǵıladı hám jolǵa qoyıladı. Sonday-aq, mádeniy miyras obektleri hám muzeylerge kiriw biletleri sanlastırıladı hám aldınnan onlayn satıp alıw imkaniyatı jaratılıp, onda, bilet operaciyalarınıń birden-bir elektron sisteması menen integraciyalanadı.
Joybarda, tájiriybeli jergilikli hám sırt el qánigelerin tartqan halda hár bir muzeydiń jeke brendin («Museum brandbook»), muzeylerdiń rásmiy veb-saytların zaman talaplarınan kelip shıqqan halda tolıq jańalaw hám olardıń mobil qosımshaların jaratıw da názerde tutıladı.
Tólemli xızmet kórsetiletuǵın mádeniy miyras obektleri hám muzeylerge kiriw biletleriniń bahaların optimallastırıw boyınsha bolsa birden-bir tártipti islep shıǵıw rejelestirilmekte.
Bunnan tısqarı, turistlik máwsimde turistler aǵımı joqarı bolǵan mádeniy miyras obektleri hám mámleketlik muzeylerdiń túngi waqıtta (saat 22:00 ge shekem) jumıs alıp barıwın jáne keliwshilerge xızmet kórsetiliwin jolǵa qoyıw ilajların kóriw názerde tutılmaqta.
Atap ótiliwinshe, bul qarar joybarınıń qabıl etiliwi nátiyjesinde mádeniy miyras obektleri hám muzeylerge kiriw biletlerin sanlastırıladı hám aldınnan satıp alıw imkaniyatı jaratıladı, mádeniy miyras obektleri hám muzeylerge keliwshi turistler aǵımınıń keskin artıwına hám jańa zamanagóy texnologiyalardıń engiziliwine erisiledi,-dep málimleme beredi xabar.uz saytı.

Qaraqalpaqstan xabar agentligi