Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti Ózbekstanda ishki turizmdi rawajlandırıwda ámelge asırılıp atırǵan reformalarǵa baǵıshlanǵan seminar shólkemlestirdi.

Ilajda senatorlar, Turizm komitetiniń basshıları, Qaraqalpaqstan Respublikası Ministrler Keńesiniń basshıları, wálayatlar hám Tashkent qalası hákimleriniń turizm máseleleri boyınsha orınbasarları, jergilikli Keńeslerdiń turaqlı komissiyalarınıń baslıqları, aymaqlıq turizm bólimleriniń basshıları, ekspertler hám ǵalaba xabar qurallarınıń wákilleri qatnastı.
Seminarda Buxara wálayatı mısalında turistler ushın jaratılıp atırǵan qolaylı sharayatlar, turistlik infrastrukturanı rawajlandırıw, ishki turizm potencialın arttırıw boyınsha ámelge asırılıp atırǵan keń kólemli reformalar hár tárepleme dodalandı. Turistlik xızmetlerdiń sapasın jaqsılaw, sanlı sheshimlerdi engiziw, jańa joybarlardı ámelge asırıw máseleleri boyınsha da pikir alıstı.
Sonday-aq, wálayat aymaǵında ishki turizmdi rawajlandırıw boyınsha ámelge asırılıp atırǵan jumıslar, rayon hám máhálle kesiminde zıyarat turizmi xızmetlerin keńeytiw, mádeniy miyras obektlerin ǵalaba en jaydırıw hám xızmet kórsetiw mádeniyatın arttırıwǵa qaratılǵan baslamalar boyınsha prezentaciya bolıp ótti.
Seminar dawamında elimizde turizm tarawında alıp barılıp atırǵan reformalar, xızmetlerdi sanlastırıw processleri, miymanxana hám transport logistikası baǵdarındaǵı jańa joybarlar, sonday-aq, tarawdaǵı aldaǵı áhmiyetli wazıypalar haqqında málimleme berildi.
Aymaqlar kesiminde ishki turizmdi jedel rawajlandırıw, infrastrukturanı jaqsılaw, turistlik potencialdan nátiyjeli paydalanıw, aymaqlardıń óz-ara birge islesiwin kúsheytiw boyınsha anıq usınıslar hám wazıypalar belgilep alındı.
Ilaj juwmaǵında ishki turizmdi rawajlandırıw, jergilikli turistlerdiń aǵımın arttırıw hám tarawda shólkemlestiriwshilik-ámeliy birge islesiwdi bunnan bılay da kúsheytiw boyınsha tiyisli usınıslar qabıl etildi.

Qaraqalpaqstan xabar agentligi