Ózbekstanda turaqlı rawajlanıwdı támiyinlew, ekonomika tarmaqların modernizaciyalaw hám ekologiyalıq turaqlılıqtı saqlaw máseleleri keyingi jıllarda mámlekettiń rawajlanıw siyasatınıń tiykarǵı baǵdarlarınan birine aylandı.

Bul processte xalıqaralıq finans institutları, sonıń ishinde, Jáhán banki menen birge islesiw ekonomikalıq reformalardı qollap-quwatlaw hám áhmiyetli tarawlarda zamanagóy qatnaslardı engiziwge xızmet etpekte.
Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov hám Jáhán bankiniń Evropa hám Oraylıq Aziyada turaqlı rawajlanıw boyınsha regionallıq direktorı Sameh Vahba arasındaǵı ushırasıwda tárepler birge islesiw perspektivaların kórip shıqtı.
Onda mámleketimizdegi makroekonomikalıq tendenciyalar, óz-ara paydalı birge islesiwdi rawajlandırıw, ámelge asırılıp atırǵan joybarlar hám olardıń nátiyjeleri boyınsha hár tárepleme pikir alısıldı.
Sóylesiwde awıl xojalıǵın rawajlandırıwda birge islesiwdi kúsheytiw, zamanagóy xalıqaralıq tájiriybeler tiykarında joybarlardı ámelge asırıw hám innovaciyalıq texnologiyalardı keńnen engiziw máseleleri dodalandı. Atap ótilgenindey, suw resursların nátiyjeli basqarıw, irrigaciya tarmaqların jetilistiriw, kanallardı modernizaciyalaw hám suwǵarılatuǵın jerlerge turaqlı suw jetkerip beriw sistemasın bekkemlew baǵdarındaǵı baslamalar áhmiyetli bolıp esaplanadı. Bul processte atmosfera hawasınıń pataslanıwına qarsı turaqlı sistema jaratıw, jasıl infrastrukturanı rawajlandırıw hám energiya nátiyjeliligin arttırıwǵa qaratılǵan baǵdarlar áhmiyetli ekeni atap ótildi.
Sóylesiwlerdiń juwmaǵında tárepler óz-ara baylanıslardı jáne de keńeytiw, turaqlı pikir alısıwdı támiyinlew hám belgilengen maqsetlerge erisiwde sistemalı birge islesiwdi dawam ettiriwge kelisip aldı.

N.Ziyodullaeva, ÓzA