Búgin milliy maqtanıshımız, ǵárezsizligimiz tımsalı – Ózbekstan Respublikası Mámleketlik gimni qabıl etilgeniniń 33 jıllıǵı belgilenbekte.

Gimnniń hár bir sózi pútkil Ózbekstan xalqınıń ásirlik arzıw-niyetlerin, kúsh-ǵayratın, xalqımızǵa tán miymandoslıq, ata-babalar esteligin hám millet maqtanıshın jámlegen.
Hár kúni teńsiz jer, jánnetmákan úlkede jasap atırǵanımızdı kewlimizge sińdirip turatuǵın qádirdan gimnimiz bolsa gimnlikke talaban 80 ge shamalas qosıqtıń sárdarı sıpatında kewillerimizge sińgen. Hár biri arnawlı komissiya tárepinen oǵada puqta, qatań kórip shıǵılǵan dáslepki gimnlerden qırqqa shamalası saylap alınıp, olardıń 27 si tańlawdıń I basqıshında qatnastı.
II hám III basqıshlardan tabıslı ótken 3 gimn teksti bolsa final basqıshına múnásip dep tabıldı. Bular – Mutal (Mutavakkil) Burxanov hám Abdulla Aripov, Baxtiyar Aliev penen Abdulla Aripov, Rustam Abdullaev hám Mirpolat Mirza birgeligindegi gimnler edi.
1992-jılı 10-dekabr kúni Oliy Kengashtiń 400 den aslam deputat jıynalǵan 11-sessiyasında gúwlegen qol shappatlawlar hám alǵıslar menen Mutal Burxanov hám Abdulla Aripov avtorlıǵındaǵı házirgi gimnimiz qabıl etildi. Óz jumısınıń sheberleri bolǵan eki avtordıń úlken dóretiwshilik potencialı sáwlelengen gimnimiz basınan aqırına shekem kewlimizdi tolqıtatuǵın sıyqırǵa iye. Elimizge tán barlıq ullılıq, xalqımızǵa tán barlıq saltanat onda jámlengen.
Ózbekstan Qaharmanı Abdulla Aripov “Umıtılmas Mutal aǵamız” maqalasında xalqımızdıń bul ullı qosıǵı haqqında bılay dep jazǵan edi: “Gimn – tiri turmıs, janlı turmıs. Ol hár qıylı pikirdegi watanlaslarımızdı bir neshe minut ishinde sóz hám muzıka kúshi menen birlestire alatuǵın ullı qúdiret bolıp esaplanadı”.
Barlıq watanlaslarımızdı usı sáne menen qutlıqlaymız, milliy gimnimizdiń qúdireti jáne de joqarılap, dúnya boylap jańlay bersin!

Muhayyo Turdalieva, Uluǵbek Twxtaev (video), ÓzA