Usı jıldıń 19-20-dekabr kúnleri Tokio qalasında Yaponiya hám Oraylıq Aziyanıń bes mámleketi basshılarınıń qatnasıwında «C5+1» formatındaǵı sammit ótkeriliwi rejelestirilmekte.

Nippon basılımınıń xabarına bola, Yaponiya bas ministri Sanae Takaitidiń region mámleketleri basshıları menen eki tárepleme ushırasıwların ótkeriw imkaniyatı da kórip shıǵılmaqta.
“Sońǵı altı ay ishinde Rossiya, Qıtay, AQSh hám basqa da mámleketler Oraylıq Aziya mámleketleri menen sammitler ótkerdi. Diplomatiyalıq kózqarastan Yaponiya da bunday sammitti tabıslı ótkeriwi júdá áhmiyetli,” – degen Yaponiyanıń hákimiyattaǵı Liberal-demokratiyalıq partiyasınıń vice-prezidenti Taro Aso.
Maǵlıwmat ornında: Yaponiyanıń sol waqıttaǵı bas ministri Fumio Kishida 2024-jıldıń 9-12-avgust kúnleri Qazaqstan, Ózbekstan hám Mongoliyaǵa rejelestirilgen saparı hám “Oraylıq Aziya + Yaponiya” sammitin Kúnshıǵıs úlkesinde júz beriwi aytılıp atırǵan kúshli jer silkiniwi sebepli biykar etken edi.
2024-jıldıń 9-avgust kúni Ózbekstan Prezidenti Shavkat Mirziyoev hám Yaponiya bas ministri Fumio Kishida arasındaǵı telefon arqalı sóylesiwde joqarı dárejedegi ushırasıwdı shólkemlestiriwdiń jańa múddetin diplomatiyalıq kanallar arqalı kelisiwge kelisip alınǵan edi.
Burın xabar bergenimizdey, usı jıldıń avgust ayında Yaponiya sırtqı isler ministriniń baspasóz xatkeri Kitamura Tosikiro “Oraylıq Aziya + Yaponiya” qarım-qatnasınıń birinshi sammitin imkanı bolǵanınsha tez múddette ótkeriw boyınsha sóylesiwler alıp barılıp atırǵanın málim etken edi.
Ózbekstan Prezidenti Shavkat Mirziyoev 27-avgust kúni Tashkentte Yaponiya sırtqı isler ministri Takesi Ivaya basshılıǵındaǵı delegaciyanı qabıl etken edi. Bul ushırasıwda da siyasiy sóylesiwdi tereńlestiriw, sawda-ekonomikalıq, investiciyalıq, finanslıq-texnikalıq hám mádeniy-gumanitarlıq birge islesiwge baylanıslı anıq joybarlardı alǵa qoyıwǵa ayrıqsha itibar qaratılǵan. Sonday-aq, “Oraylıq Aziya + Yaponiya” formatındaǵı bolajaq sammit boyınsha da pikir alısılǵan edi.
Bul qarım-qatnas formatı shólkemlestirilgenine 21 jıl boldı. Yaponiya burınǵı sırtqı isler ministri Yoriko Kavaguchtıń 2004-jıl 26-avgustta Tashkentke saparı waqtında shólkemlestirilgen bul siyrek ushırasatuǵın format Kúnshıǵıs úlkesi hám Oraylıq Aziyanıń bes mámleketi (Ózbekstan, Qazaqstan, Qırǵızstan, Tájikstan hám Túrkmenstan) arasındaǵı baylanıslardı rawajlandırıwda nátiyjeli platformaǵa aylandı.
Házirgi waqıtqa shekem “Oraylıq Aziya + Yaponiya” qarım-qatnasınıń sırtqı isler ministrleri dárejesinde toǵız ushırasıwı ótkerilgen.
Yaponiya sırtqı isler ministri Takesi Ivayaǵa bola, rásmiy Tokio “Oraylıq Aziya + Yaponiya” sóylesiwi sheńberinde region menen qatnasıqlardı bunnan bılay da bekkemlew hám birgelikte nızam ústinligine tiykarlanǵan erkin hám ashıq xalıqaralıq tártipti isenimli qollap-quwatlaw niyetinde, -dep málimleme beredi xabar.uz saytı.

Qaraqalpaqstan xabar agentligi