Ózbekstan jurnalistler awqamı Qaraqalpaqstan bólimi hám Awıl xojalıǵı ministrligi Málimleme xızmetiniń baslaması menen ǵalaba xabar quralları ushın Taqıyatas rayonına press-tur shólkemlestirildi.

Onda ilaj qatnasıwshıları «Nukus Universal Baza» juwapkershiligi sheklengen jámiyetine qaraslı ıssıxana jumısları menen jaqınnan tanıstı.
– Bul ıssıxana 2018-jılı Koreya Respublikasınan alıp kelingen zamanagóy texnologiyalar tiykarında úskenelengen bolıp, házir bir gektar maydanda Yaponiyanıń “Betis F1” sortlı pomidorı jetistirilmekte, -deydi jámiyet baslıǵı Vaxid Qurbaniyazov. – Íssıxanda 3 adam turaqlı jumıs penen támiyinlengen. Al, máwsimlik jumıslar dáwirinde bolsa 20-25 adamdı jumıs penen támiyinlep atırmız. Házir avgust ayında ekken pomidorlarımız pisip, respublikamızda jaylasqan bazarlarǵa satıp atırmız.
Press-tur dawamında jurnalistler “Nukus Universal Baza” JShJ hám Agrosanaattı rawajlandırıw agentliginiń Taqıyatas rayonlıq bólimi menen birgelikte ıssıxana iyeleri ushın pomidor hám basqa da ıssıxanada jetistiriletuǵın palız eginleriniń sortlarına baǵıshlanǵan seminardıń gúwası boldı.
– Taqıyatas rayonında jámi 26 gektar maydanda ıssıxanalar bolıp, olar qıs máwsiminde aymaq xalqın arzan hám sapalı pomidor, qıyar hám basqa da túrdegi awıl xojalıǵı ónimleri menen turaqlı támiyinlep kelmekte, -deydi Agrosanaattı rawajlandırıw agentliginiń rayondaǵı joybarlaw ofisi bas qánigesi Jetkinshek Ibrayımov. – Házir rayon turǵınları arasında ıssıxana xojalıqlarında aldıńǵı tájiriybelerdi úgit-násiyatlaw, ónim jetistiriw nátiyjeliligin arttırıw hám diyqanlardıń óz-ara birge islesiwin kúsheytiw maqsetinde, kórgizbeli seminar ótkermektemiz. Bul álbette, óziniń unamlı nátiyjesin beredi dep oylaymız.
Ótkerilgen press-tur dawamında jurnalistler jámiyette islewshi qánigeler menen sáwbetlesip, olardan tiyisli juwaplar aldı.

Qaraqalpaqstan xabar agentligi