Mashina qurılısı tarawındaǵı belgili ilimpaz, Tashkent mámleketlik texnika universitetiniń professorı, Ózbekstanǵa xızmet kórsetken awıl xojalıǵı mexanizatorı Azmiddin Sadriddinovich Sadriddinov bıyıl 4-dekabr kúni 89 jasında qaytıs boldı.

A.Sadriddinov 1936-jılı 26-iyunde Tashkent qalasında ziyalı shańaraǵında tuwıldı. Orta mektepti tamamlaǵannan soń Tashkent jeńil sanaat institutında injener-mexanik qánigeligi boyınsha bilim aldı. Miynet jolın Orta Aziya politexnika institutı (házirgi Tashkent mámleketlik texnika universiteti) nda aǵa laborant lawazımında basladı. Usı oqıw ornınıń aspiranturasında bilim alıp, dáslep kandidatlıq, keyin ala doktorlıq dissertaciyasın qorǵadı.
Talantlı ilimpaz Tashkent mámleketlik texnika universitetinde aǵa oqıtıwshı, docent, Mexanika, Traktor hám awıl xojalıǵı mashina qurılısı fakultetleriniń dekanı, birinshi prorektor, professor, Ministrler Kabineti janındaǵı Awıl xojalıǵı ilimiy-óndirislik orayınıń Tashkent wálayatı bóliminiń baslıǵı sıyaqlı lawazımlarda nátiyjeli xızmet etip, elimizde joqarı mamanlıqtaǵı kadrlardı tayarlaw, agrar tarawdı zaman talapları tiykarında mexanizaciyalawǵa baylanıslı ilimiy islenbe hám qollanbalar tayarlaw, olardı ámeliyatqa engiziw processlerine múnásip úles qostı.
Miynetkesh ilimpaz hám pedagog 65 jıldan aslam waqıt dawamında kóp táreplemeli jumısı dawamında paxta teriw mashinaların jetilistiriw boyınsha nátiyjeli izertlewler alıp bardı, bul baǵdarda kóplegen maqalalar, broshyura hám monografiyalar, ámeliy islenbe hám metodikalıq qollanbalar jarattı. Ásirese, agrar tarmaqtıń rawajlanıwı ushın úlken áhmiyetke iye bolǵan 40 tan aslam ilimiy joybarlar, mámleketlik grantlar hám xojalıq shártnamaları tiykarındaǵı ilimiy-izertlew jumıslarına basshılıq etkeni, paxta teriw mashinaların jetilistiriw boyınsha laboratoriya bazasına tiykar salǵanı elimizdiń awıl xojalıǵında texnikalıq hám texnologiyalıq reformalardı ámelge asırıwda úlken áhmiyetke iye boldı.
Ustaz ilimpaz tájiriybeli pedagog sıpatında kóplegen shákirtler tayarladı, onıń basshılıǵında onlaǵan kandidatlıq hám 5 doktorlıq ilimiy jumısı qorǵaldı.
A.Sadriddinovtıń elimizdiń awıl xojalıǵı mashina qurılısın rawajlandırıw baǵdarındaǵı xızmetleri mámleketimiz tárepinen múnásip sıylıqlandı. Ol “Ózbekstanǵa xızmet kórsetken awıl xojalıǵı mexanizatorı” húrmetli ataǵı, “Dwstlik” hám “Mehnat shuhrati” ordenleri menen sıylıqlandı.
Belgili ilimpaz hám pedagog, jaslardıń mehriyban ustazı, haq kewil hám kishipeyil insan Azmiddin Sadriddinovtıń esteligi qálbimizde hámiyshe saqlanıp qaladı.

Sh.Mirziyoev, T.Norboeva, N.Ismoilov,
A.Aripov