Usı jıldıń 9-dekabr kúni Ekinshi jer júzilik urıs veteranı, el-xalqımızdıń húrmetine bólengen nuranıy Qadirbay Narmanov 100 jasında qaytıs boldı.

Qadirbay Narmanov 1925-jılı Ámiwdárya rayonında tuwılǵan. 1943-jılı Buxara wálayatı Kogon qalasında áskeriy tayarlıqtı ótegen hám sol jıldıń ózinde Oraylıq fronttıń 60-armiyası artilleriya divizionı qatarında dushpanǵa qarsı sawashqa kirgen. Márt jawınger bir qatar sawashlarda qatnasıp, qaharmanlıqtıń joqarı úlgisin kórsetken. 1944-jılı sawash maydanlarında arttırǵan awır nawqaslıǵı sebepli fronttan qaytarılǵan.
Urıstan qaytqannan soń da jawıngerdiń Watan aldındaǵı xızmetleri dawam etip, front artındaǵı miynet frontında ayanbay xızmet etken. Urıstan keyingi ómirinde de hadal miyneti, kishipeyilligi hám adamgershilik pazıyletleri menen kóplegen adamlardıń húrmetine ılayıq bolǵan.
1945-jıldan 1952-jılǵa shekem Qıpshaq xojalıǵında jumısshı, sonday-aq, húrmetli demalısqa shıqqannan soń da óz miynet jolın dawam ettirip, 1984-jıldan 1990-jılǵa shekem tutınıwshılar jámiyetinde transport basqarıwshı bolıp xızmet etken.
Ol kishipeyil, haqkewil, pidayı hám jankúyer insan edi. Uzaq jıllıq miynet jolı dawamında miynetsúygish, tereń bilimli, istiń kózin biletuǵın sheber shólkemlestiriwshi sıpatında óziniń bay tajiriybesi, bilim hám kónlikpeleri menen húrmetke iye boldı, kóplegen shákirtlerdi tárbiyaladı.
Áziz hám dańqlı veteranımızdıń teńsiz qaharmanlıqların xalqımız bárqulla yadında saqlaydı hám olardıń mártligine bárhama tájim etip, eske aladı.
Qadirbay Narmanovtıń ómiri, Watanǵa bolǵan sadıqlıǵı hám xalqımızdıń tınısh-paraxat turmısı jolında kórsetken mártligi hesh qashan umıtılmaydı.
Marhumnıń shańaraq aǵzaları, aǵayin-tuwısqanları, jaqınları hám shákirtlerine tereń qayǵırıw menen kewil aytamız.

A.Orınbaev, F.Ermanov, R.Nurazizov, A.Atajanov, R.Raxmonov, T.Abdijabbarov, A.Daniyarov.