Jámiyette huqıqıy mádeniyattı arttırıw, ásirese, jaslarǵa Konstituciyalıq qádiriyatlardı úgit-násiyatlaw baǵdarında bir qatar ámeliy jumıslar alıp barılmaqta. Usı maqsette, Ishki isler ministrligi janındaǵı Nókis “Temurbekler mektebi” áskeriy-akademiyalıq liceyiniń májilisler zalında Ózbekstan Respublikası Konstituciyası qabıl etilgenliginiń otız úsh jıllıǵı múnásibeti menen ilaj bolıp ótti.

Ilajda Ózbekstan Xalıq demokratiyalıq partiyası Qaraqalpaqstan Respublikası Keńesi baslıǵı, Qaraqalpaqstan Respublikası Joqarǵı Keńesindegi partiya frakciyası basshısı Xalilla Eshimbetov, Qaraqalpaqstan Respublikası sudınıń sudyası Nagima Baltabaeva, Qaraqalpaqstan Respublikası Ishki isler ministriniń másláhátshisi Orınbay Turdaqov, Qaraqalpaqstan Respublikası Ádillik ministriniń birinshi orınbasarı Seydaxmet Asanov, Oliy Majlis Nızamshılıq palatası janındaǵı Jaslar parlamentiniń aǵzası Xanna Utemuratovalar shıǵıp sóylep, jıynalǵanlardı bayram menen qutlıqladı hám bayanatlar jasadı.
Atap ótilgenindey, Konstituciya mámlekettiń siyasiy-huqıqıy rawajlanıwında ayrıqsha orın iyelep, mámleket hám puqaralar arasındaǵı juwapkershilikli qatnasıqlardıń bekkem normativlik tiykarın belgilep beredi. Bas nızam mámlekettiń huqıqıy kórinisin belgilep beriwshi tiykarǵı normativlik hújjet sıpatında ulıwmaxalıqlıq awızbirshilik, insanıylıq principleri hám nızam ústinligin támiyinlewde áhmiyetli orın iyeleydi.
Mámleketimizde Konstituciyanıń jańa redakciyasın turmısqa engiziw procesinde jaslardıń belsene qatnasıwı úlken áhmiyetke iye. Jaslar huqıqıy bilimge iye bolsa, olar jámiyetlik-siyasiy processlerde belsendi, juwapkershilikli hám intaker bolıp qáliplesedi.
Ilaj jaslardıń huqıqıy bilimlerin jáne de bekkemlew, puqaralıq juwapkershiligin arttırıw hám Konstituciyada názerde tutılǵan huqıq hám imkaniyatlardan tolıq paydalanıw mádeniyatın qáliplestiriwge xızmet etti.
Sonday-aq, ótkerilgen ilajda jaslardıń huqıqıy bilimlerin jáne de tereńlestiriw maqsetinde, Konstituciyada belgilengen normalar boyınsha shólkemlestirilgen soraw-juwapta oqıwshı-jaslar belsene qatnastı.
Ilaj sońında tiykarǵı pán olimpiadasında jeńimpaz bolǵan licey oqıwshıları hám olardıń ustazlarına alǵısnamalar hám estelik sawǵaları saltanatlı túrde tapsırıldı.

Qaraqalpaqstan xabar agentligi