Xosh xabar

Moynaq káni 2-sanlı izlew burǵılaw qudıǵınan burǵılaw jumıslarınan keyin sanaat kóleminde tábiyǵıy gaz aǵısı alındı. Bul qudıq Qaraqalpaqstan Respublikası Moynaq rayonı Úshsay kóli aymaǵında jaylasqan. Qudıqtı burǵılaw jumısları “Ózbekneftgaz” AJ tárepinen orınlandı. Qudıqta izlew burǵılaw jumısları usı jıldıń 31-avgust sánesinde baslanıp, 24-noyabrde juwmaqlandı.
Al, 1-dekabr kúni bolsa, bul qudıqta ónimdarlıqqa sınaw jumısları nátiyjesinde qudıqtan sanaat kóleminde tábiyǵıy gaz aǵımı alındı. Neft hám gaz kánlerin paydalanıw qaǵıydasına tiykarlanıp burǵılaw jumıslarınan keyin qudıqtan tábiyiy gaz aǵımı alınsa, qudıqtı tazalaw ushın ashıq hawada jaǵıp qoyıladı, keyin qudıq burǵılaw eritpesi járdeminde sóndiriledi hám qudıqtan burǵılaw minarası demontajlanıp, onıń ústińgi bólimi arnawlı trubalar menen úskenelenedi hám iske túsiriledi.
Solay etip, 7-dekabr sánesinde Moynaq 2-sanlı qudıǵınan tábiyǵıy gaz aǵısı alınǵannan keyin qudıq gazi qudıqtı tazalaw maqsetinde ashıq hawaǵa jaǵıldı hám qudıqtan burǵılaw minarası demontajlanıp, onıń ústińgi bólimi zárúrli úskeneler menen úskenelenip qudıq iske túsirildi. Qudıqtan qazıp alınıp atırǵan tábiyǵıy gaz házirgi waqıtta “Óztransgaz” AJ qubırı sistemasına jetkerip berilmekte. Qudıqtı burǵılaw hám sınaw jumısların orınlaw procesinde hesh qanday avariya yamasa nasazlıq jaǵdayı baqlanbadı.

Qaraqalpaqstan xabar agentligi