Ózbekstan Respublikası Prezidentiniń 2021-jıl 9-avgusttaǵı PQ-5216-sanlı qararı tiykarında elimizde sociallıq qollap-quwatlawǵa mútáj balalar hám ata-ana qaramaǵınan ayırılǵan jaslardı qollap-quwatlaw, olardı erkin turmısqa tayarlaw, múnásip sharayatlar menen támiyinlew baǵdarında sistemalı jumıslar ámelge asırılmaqta.

Elimizdegi eń ullı hám áziz bayramlardıń biri bolǵan 8-dekabr- Ózbekstan Respublikası Konstituciyası qabıl etilgen kún múnásibeti menen Taxtakópir rayonında, Prezidentimizdiń joqarıda atı atalǵan qararınıń orınlanıwın támiyinlew maqsetinde, aymaqta jasawshı úsh jasqa barlıq qolaylıqlarǵa iye eki xanalı turaq jaylar tapsırıldı.
Ilajda rayon hákimi Jambul Adilov elimizde húrmetli Prezidentimiz basshılıǵında jaslarǵa, sonıń ishinde, sociallıq qollap-quwatlawǵa mútáj, ata-ana qaramaǵınan ayırılǵan jaslarǵa jaratılıp atırǵan imkaniyatlar hám islenip atırǵan unamlı jumıslar haqqında keń túrde aytıp ótip, búgingi kúni ámelge asırılıp atırǵan iygilikli isler bunıń ayqın dáliyli ekenligine toqtaldı hám jańa turaq jay iyelerin quwanıshlı sáne menen qızǵın qutlıqladı. Bunnan soń rayon hákimi juwapker shólkemlerdiń basshıları hám keń jámiyetshilik wákilleriniń qatnasıwında jaslarǵa jańa turaq jaydıń giltlerin saltanatlı túrde tapsırıp, ondaǵı jaratılǵan sharayatlar menen jaqınnan tanıstı.

Qaraqalpaqstan xabar agentligi