Tek ǵana universitet emes, al Qaraqalpaqstan Respublikasında birinshi márte jasalma intellekt járdeminde gazeta islendi.
Onlayn tárizdegi bul basılım tájiriybe sıpatında jaratıldı. Bul joybar mass-media tarawında sanlı texnologiyalardı qollanıw baǵdarındaǵı áhmiyetli qádem esaplanadı.
Onlayn gazetanıń barlıq tekstleri, dizaynı hám ayırım vizual materialları jasalma intellekt baǵdarlamaları arqalı islep shıǵılǵan.
– Bul kishi joybardıń tiykarǵı maqseti – málimleme jetkeriwdiń jańa usılların sınaqtan ótkeriw hám jergilikli media mákandı zamanagóy texnologiyalar menen ele de bayıtıw bolıp esaplanadı, – deydi Jurnalistika kafedrasınıń docenti, filologiya ilimleri doktorı (DSc) Qumar Begniyazova. – Onlayn jasalma intellekt arqalı jaratılǵan gazetanı men kafedranıń stajyor-oqıtıwshısı, 2-kurs magistrantı Biybisara Jartıbaeva menen birge tayarladım. Gazetada interaktiv videolar, grafikalar, multimedialıq kontentler hám basqa da qızıqlı materiallar berilip barıladı.
Maǵlıwmat ushın, bul Prezidentimizdiń tarawlarda jasalma intellektten paydalanıw boyınsha bergen tapsırmaları negizinde jaratılǵan joybar – gazeta. Ol tek ilimiy-ámeliy tájiriybe sınaw bolıp, jaqın keleshekte basqa tematikalıq baǵdardaǵı real baslamaǵa aylanıwı da rejelestirilmekte. Gazetanıń tolıq onlayn versiyasın mına silteme arqalı oqısańız boladı (https://www.dropbox.com/t/2PYfOMMiIyPVuTtD).
.
Qaraqalpaqstan xabar agentligi