Sanlı texnologiyalar ministri Sherzod Shermatov AQShtıń “Cerberus Frontier” kompaniyasınıń basqarıwshı direktorı Mixail Nibladze basshılıǵındaǵı delegaciya menen ushırasıw ótkerdi.

Dáslep miymanlarǵa IT Park tárepinen Ózbekstandaǵı sanlastırıw processleri hám IT-mákanda ámelge asırılıp atırǵan iri joybarlar boyınsha prezentaciya kórsetildi. Prezentaciyada startap ekosisteması, IT kadrlar tayarlaw sisteması, xalıqaralıq kompaniyalar ushın jaratılǵan qolaylı sharayatlar haqqında hár tárepleme maǵlıwmat berildi.
Ushırasıw dawamında tárepler mámleketimizde sanlastırıw processlerin jedellestiriw, telekommunikaciya bazarında ámelge asırılıp atırǵan reformalar, tarawǵa tikkeley investiciyalardı keńnen tartıw máselelerin dodaladı. Sonday-aq, miymanlar Senior’s Capital Management sheńberinde “Cerberus Frontier” hám “Unitel Group”tıń birgeliktegi tájiriybesi, sonıń ishinde, Gruziya hám Mongoliyada ámelge asırǵan joybarları haqqında maǵlıwmat berdi.
Ministr mámleketimizde xalıqtıń sanı jedel pátlerde ósip atırǵanı, IT hám telekom tarawlarında jaratılǵan imkaniyatlar, salıq jeńillikleri, qolaylı biznes ortalıǵı hám infrastrukturanıń izbe-iz keńeyip atırǵanına toqtap ótti. Ushırasıwda infrastruktura almasıwı, sırt el investorları ushın jaratılǵan sharayatlar, sonday-aq, IT Park tárepinen usınıs etilip atırǵan qolaylıqlar boyınsha da pikir alısıldı.
Atap ótiliwinshe, sóylesiw keleshekte birgeliktegi joybarlardı rawajlandırıw, jańa texnologiyalıq sheshimlerdi engiziw hám ekonomikanıń sanlı sektorında jańa imkaniyatlar jaratıwǵa xızmet etedi.

Nigora Rahmonova, ÓzA