9-dekabr – Xalıqaralıq korrupciyaǵa qarsı gúresiw kúni múnásibeti menen Qaraqalpaqstan Respublikası Bajıxana basqarmasında Qaraqalpaqstan Respublikası Prokuraturası hám MQX Qaraqalpaqstan Respublikası basqarması xızmetkerleriniń qatnasıwında ushırasıw ótkerildi.

Ilaj dawamında bajıxana uyımlarında da korrupciyaǵa qarsı gúresiwde jumıslar jedel alıp barılıp atırǵanlıǵı, bajıxana qadaǵalawı hám rásmiylestiriw processleri avtomatlastırılıp atırǵanlıǵı, arnawlı jańa programmalar islep shıǵılıp, insan faktorı keskin qısqartılǵanlıǵı atap ótildi.
Korrupciya paraxorlıq, sociallıq tutınıw ushın mólsherlengen tovarlar hám xızmetlerdi nızamsız ózlestiriw, ruwshılıq, jerleslik sıyaqlı kórinislerge iye.
Maǵlıwmatlarda atap ótilgenindey, basqarma xızmetkerleri tárepinen xızmet wazıypaların orınlaw procesinde dámegóylik, paraxorlıq, xızmet hám lawazım wákilligi sheńberinen shıǵıw sıyaqlı jınayatlardıń hám basqa da unamsız nızam buzılıw jaǵdayları júz beriwiniń aldın alıw boyınsha jeke quram arasında 121 márte ulıwma profilaktikalıq májilisler ótkerilgen. 104 xızmetker menen jeke tártiptegi tárbiyalıq-profilaktikalıq sáwbetlesiw, 27 márte jasırın tekseriwler ótkerilgen. Islengen nızambuzıwshılıq jaǵdayları hám puqaralardıń múrájatlarına tiykarlanıp 16 márte xızmet tekseriwi alıp barılǵan.
Bajıxana tarawın korrupciyadan awlaq sistemaǵa aylandırıw ushın bajıxana xızmetkeriniń sociallıq qorǵalıwın bekkemlewge ayrıqsha itibar qaratılmaqta. Atap aytqanda, házirgi kúnge shekem aymaqlıq basqarmanıń 3 xızmetkerine ipoteka krediti tiykarında turaq jay satıp alıw ushın dáslepki tólem ushın 25 procent muǵdarında subsidiya pulları ajıratıp berilgen. 2 xızmetkerge turaq jay satıp alıw hám rekonstrukciyalaw ushın 600 million sum muǵdarında ssuda ajıratılǵan. 5 xızmetkerge 14 procentlik ipoteka kreditlerin alıwında ámeliy járdem kórsetilgen. Joqarı bilimlendiriw mákemelerine oqıwǵa kiriwi ushın usınısnamalar berilgen bolıp, jámi 31 xızmetkerdiń perzentleri qosımsha kvota tiykarında mámleketlik joqarı bilimlendiriw mákemeleriniń studenti bolǵan.
Bul baǵdardaǵı ushırasıwlar dawam etpekte.

Á.Jiyemuratov,
Qaraqalpaqstan xabar agentligi