Kegeyli rayonındaǵı Jaslar orayında rayonlık Ishki isler bólimi, Kámbaǵallıqtı qısqartıw hám bántlikke kómeklesiw bólimi tárepinen probaciya esabında turǵan hám migraciyadan qaytqan jumıssız puqaralardıń bántligin támiyinlew maqsetinde bos jumıs orınları yarmarkası shólkemlestirildi.

Oǵan rayon aymaǵında jaylasqan 8 kárxana ózlerinde bar bolǵan 53 bos jumıs orınları menen qatnasıp, onda puqaralar ózleriniń tańlaǵan kásibi boyınsha jumısqa ornalastı.

Atap aytqanda, solardan 10 puqaraǵa turaqlı jumıs orınlarına jollamalar berilgen bolsa, 6 puqaraǵa taraw qánigeleri tárepinen huqıyqıy másláhátler berildi.

– Bul yarmarkaǵa qatnasıw ushın Abat mákan elatınan keldim hám  Kegeyli rayonlıq Jollardan paydalanıw kárxanasına jumısshı bolıp jumısqa ornalastım, – deydi usınday puqaralardıń biri Dáwranbek Ibragimov. – Bunday ilajdı shólkemlestirgeni ushın barlıq shólkemlestiriwshilerge úlken raxmet aytaman.

Házirgi kúnleri bunday bos jumıs orınları yarmarkaları belgilengen reje tiykarında pútkil respublikamız aymaqları boylap ótkerilmekte.

Qaraqalpaqstan xabar agentligi