2025-jıl 7-dekabrde hár jılı ótkeriletuǵın Doxa forumında Oraylıq hám Qubla Aziya arasındaǵı óz-ara baylanıslılıq boyınsha Termiz sóylesiwine baǵıshlanǵan óz aldına sessiya bolıp ótedi. Bul sessiya “Regionallıq baylanıslılıq arqalı Awǵanstandı qayta tiklew: Termiz sóylesiwi” súreni astında ótkeriledi.

Ilaj Ózbekstan Respublikası Prezidenti janındaǵı Strategiyalıq hám regionlararalıq izertlewler institutı (SRII) tárepinen Qatardaǵı Jorjtaun universiteti filialınıń Xalıqaralıq hám regionallıq izertlewler orayı menen birgelikte shólkemlestirilmekte.
2025-jıl may ayında Termiz qalasında baslanǵan Termiz sóylesiwi Ózbekstan Prezidenti Shavkat Mirziyoevtiń BMSh Bas Assambleyasınıń 2022-jıl 11-iyuldegi arnawlı rezolyuciyası menen qollap-quwatlanǵan Oraylıq hám Qubla Aziya arasındaǵı óz-ara baylanıslılıqtı bekkemlew baslamasın ámeliy alǵa qoyıw ushın turaqlı platforma bolıp esaplanadı.
Búgin tereń geosiyasiy ózgerisler sharayatında Oraylıq hám Qubla Aziya arasındaǵı tariyxıy baylanıslardı qayta tiklew zárúrlikke aylanbaqta. Óz-ara baylanıslılıq, birge islesiw, qarım-qatnas hám isenim strategiyalıq áhmiyetli makroaymaqta qáwipsizlik, turaqlılıq hám izbe-iz rawajlanıwdı támiyinlewdiń áhmiyetli shárti bolıp esaplanadı.
Awǵanstan bul processlerde ayrıqsha orın iyeleydi. Geografiyalıq jaylasıwı sebepli mámleket eki region arasında tábiyiy kópir wazıypasın atqaradı. Pragmatikalıq birge islesiwdi rawajlandırıw, ekonomikalıq baylanıslardı keńeytiw hám Awǵanstannıń regionlararalıq processlerde qatnasıwı Oraylıq hám Qubla Aziyada uzaq múddetli turaqlılıq hám tınısh rawajlanıwdı támiyinlewde sheshiwshi faktorlar sıpatında qaraladı.
Áyne usı máseleler bolajaq sessiyanıń kún tártibiniń orayında boladı. Qatnasıwshılar Awǵanstannıń transregionallıq baylanıstı támiyinlewdegi rolin, sonday-aq, keńirek regionallıq kontekstte turaqlı sociallıq-ekonomikalıq rawajlanıwdı qollap-quwatlaw boyınsha ámeliy qádemlerdi dodalaydı.
Sessiyanı Qatardaǵı Jorjtaun universitetiniń Xalıqaralıq hám regionallıq izertlewler orayınıń direktorı Zahra Babar alıp baradı.
Dodalawda tómendegiler qatnasadı:
– Ózbekstan Respublikası Prezidentiniń Awǵanstan boyınsha Arnawlı wákili Ismatulla Irgashev;
– SRII direktorı Eldor Aripov;
– Awǵanstan Sırtqı isler ministrligi janındaǵı Strategiyalıq izertlewler orayınıń direktorı Abdul Hay Qanit;
– Qatar sırtqı isler ministriniń arnawlı wákili Faysal Abdulloh Al-Hanzab;
– Qatardaǵı Jorjtaun universiteti tariyx professorı Valid Ziad.
Esletip ótemiz, Doxa forumı 2002-jıldan berli Qatar húkimetiniń járdeminde ótkerilip kelinbekte hám áhmiyetli globallıq mashqalalardı dodalaw ushın húrmetli platforma esaplanadı. 2025-jılı forum “Ádillik ámelde: wádelerden rawajlanıwǵa qaray” temasında bolıp ótedi.
Onda AQSh, Ullı Britaniya, Rossiya, Evropa Awqamı mámleketleri, Jaqın Shıǵıs, Hindstan, Pakistan, Qıtay, Yaponiya hám Koreyanıń jetekshi tallaw oraylarınıń basshıları hám qánigeleri, jámi 150 ge shamalas mámleketten 8 mıńǵa shamalas qatnasıwshı qatnasıwı kútilmekte.

ÓzA