Qaraqalpaqstan Respublikası sudı tárepinen xalıq salamatlıǵın hám jámiyetlik qáwipsizlikti támiyinlewge qaratılǵan áhmiyetli temalardan biri – shaxstı májbúriy tártipte psixiatriya stacionarına jatqarıw hám bul processtiń huqıqıy mexanizmlerine baǵıshlanǵan ámeliy seminar shólkemlestirildi.

Ilajda densawlıqtı saqlaw mákemeleri, prokuratura, ishki isler uyımları, “Adolat” social-demokratiyalıq partiyasınıń wákilleri, Qaraqalpaqstan Respublikası sudınıń puqaralıq isleri boyınsha sudlaw kollegiyası hám rayonlararalıq sudlardıń sudyaları qatnastı.
Seminar jumısın Qaraqalpaqstan Respublikası sudı baslıǵınıń orınbasarı A.Kerimbaev ashtı hám basqarıp bardı.
Ilajda atap ótilgenindey, elimizde shaxstı májbúriy túrde psixiatriya mákemesine jatqarıw procesi tek ǵana medicinalıq emes, al huqıqıy hám sociallıq áhmiyetke iye bolıp, bul baǵdarda sud hújjetleriniń orınlanıwın támiyinlew, elektron hújjet almasıwın jetilistiriw hám uyımlar arasındaǵı birge islesiwdi kúsheytiw tiykarǵı máselelerden biri sıpatında belgilendi.
Seminarda bayanatshılar tárepinen shaxstı májbúriy tártipte psixiatriya stacionarına jatqarıw isleri sudlarda qanday tártipte kórip shıǵılıwı hám bul processtiń ózine tán huqıqıy tárepleri haqqında maǵlıwmat berildi. Atap ótiliwinshe, bunday jatqarıw medicinalıq járdemniń arnawlı túri bolıp, tek ǵana shıpakerlerdiń juwmaǵı hám nızamlı tiykarlar bar bolǵanda ámelge asırıladı. Sud tárepinen isler on kúnlik múddette, nızamlı wákil, shıpaker-psixiatr, prokuror hám mákeme wákilleriniń qatnasıwında kórip shıǵıladı.
Seminar dawamında qatnasıwshılar, ásirese, medicina mákemeleriniń wákilleri bayanatshılarǵa kóplegen sorawlar menen múrájat etip, olar keń túrde dodalandı. Dodalawlar tiykarınan ámeldegi tártiplerdi jetilistiriw, uyımlar arasındaǵı birge islesiwdi kúsheytiw hám puqaralardıń huqıqların támiyinlew mexanizmlerin jáne de ashıq-aydın etiw máselelerine qaratıldı.
Ilaj juwmaǵında jámiyetlik qáwipsizlik, puqaralardıń salamatlıǵın qorǵaw baǵdarında bir qatar usınıslar islep shıǵıldı.

Qaraqalpaqstan xabar agentligi