Miyrim-shápáát hám qayırqomlıq isleri – insanlardıń bir-birine bolǵan isenimin hám tileklesligin kórsetedi. Qaraqalpaqstan Respublika Joqarǵı Keńesiniń baslaması menen hár jılı ótkerilip atırǵan «Mehir-múriwbet háreketi» sheńberinde respublikamızda jasawshı puqaralarǵa materiallıq, ruwxıy, medicinalıq hám huqıqıy járdemler kórsetilmekte.
Atap aytqanda, bıyılǵı jılı respublikamız boyınsha sociallıq qorǵawǵa mútáj hám kámbaǵallıq reestrine kirgizilgen 1544 shańaraqqa járdemler beriledi.
Keshe Qaraqalpaqstan Respublikası Densawlıqtı saqlaw ministrligi hám Ádillik ministrliginen arnawlı túrde ajıratılǵan tar sheńberdegi shıpakerler, mobil mámleketlik xızmetler hám mámleketlik xızmetkerler Beruniy rayonındaǵı Abay hám Beruniy awıl puqaralar jıyınlarında, Tórtkúl rayonında bolıp, aymaq xalqına ózleriniń járdemlerin kórsetti.
– Qaraqalpaqstan Respublikası Ádillik ministri Elmurod Tursunov tárepinen keshe usı rayonlardaǵı 7 shańaraqqa materiallıq járdem kórsetildi, – deydi ministrliktiń huqıqıy málimleme sektorı baslıǵı Nuriya Berdiniyazova. – Sonıń menen birge, aymaq turǵınlarına mobil mámleketlik xızmetler tárepinen de xızmetler kórsetilip, olardıń mashqalaları sheship berilmekte.
Házirgi kúnleri «Mehir-múriwbet háreketi» respublikamız boylap dawam etpekte.

Adilbay Orazov,
Qaraqalpaqstan xabar agentligi sholıwshı