Hár bir insannıń ármanı tınısh, abadan hám baxıtlı ómir súriw. Biraq turmısta sonday sharayatlar boladı, insan materiallıq jetispewshilik, imkansızlıq yamasa belgili bir qıyın jaǵdaylarǵa túsip qalıwı múmkin. Kámbaǵallıq – bul tek ǵana aqshanıń joqlıǵı emes, al imkaniyatlar sheklengen jaǵday. Bunday jaǵdayda insanda erk-ıqrar, mámlekette bolsa ǵamxorlıq bolsa abadanlıqqa qaray jol tabıw múmkin.
Búgingi kúnde mámleketimizde kámbaǵallıqtı azaytıw, hár bir insan ushın múnásip turmıs sharayatın jaratıw baǵdarında keń kólemli ilajlar ámelge asırılmaqta.
Qaraqalpaqstan Respublikası Nuranıy fondı tárepinen orınlarda sociallıq qorǵawǵa mútáj shańaraqlardı materiallıq hám ruwxıy qollap-quwatlawǵa qaratılǵan ilajlar dawam ettirilmekte.
Ózbekstan Respublikası Prezidentiniń 2024-jıl 25-noyabrdegi “Kámbaǵallıqtan abadanlıqqa qaray” baǵdarlamasın ámelge asırıwǵa belsendi nuranıylardı tartıw ilajları haqqında”ǵı qararı tiykarında Qanlıkól rayonında kekse áwlad wákilleriniń bilim hám tájiriybesinen paydalanǵan halda shańaraqlardı kámbaǵallıqtan shıǵarıw sistemasın engiziw maqsetinde 33 nuranıy 11 máhálleden 165 shańaraqqa biriktirilgen bolıp, xalıqtıń turmıs tárizin jaqsılaw ushın bir qatar ámeliy jumıslar alıp barılmaqta.
Sonıń ishinde, fondtıń qáwenderlik qarjıları tiykarında úyreniwler nátiyjesinde anıqlanǵan kem támiyinlengen, mayıplıǵı bar, baǵıwshısın joǵaltqan 91 shańaraqtıń perzentlerine sapalı bilim alıwı ushın zárúr oqıw quralları, stol-stullar, sport kiyimleri sawǵa etildi.
Álbette, bunday jumıslar elimizde alǵa qoyılıp atırǵan “Insan qádiri ushın” principiniń ámeliy kórinisi bolıp esaplanadı.

Qaraqalpaqstan xabar agentligi