Ózbekstan Respublikası Densawlıqtı saqlaw ministrliginiń kórsetpeleri tiykarında Medicina xızmetkerleriniń kásiplik mamanlıǵın rawajlandırıw orayınıń “Jámiyet salamatlıǵı hám densawlıqtı saqlawdı basqarıw” kafedrası Germaniya xalıqaralıq texnikalıq birge islesiw jámiyeti (GIZ) milliy wákilxanası menen birge islesiwdi rawajlandırıwǵa ayrıqsha itibar qaratpaqta.

Sonıń ishinde, densawlıqtı saqlaw sistemasında ámelge asırılıp atırǵan strukturalıq dúzilis hám qarjılandırıw transformaciyası principlerinen kelip shıqqan halda, Germaniya xalıqaralıq birge islesiw jámiyeti (GIZ) milliy wákilxanası menen birgelikte, tarawdıń basshı xızmetkerleri ushın aldınǵı xalıqaralıq tájiriybeni esapqa alatuǵın eki túrdegi integraciyalıq qánigelik arttırıw kurslarınıń baǵdarlamaları 2025-jılı islep shıǵıldı. Bıyıl rejelestirilgen tórt oqıw kurslarınıń bir bólimi Germaniya xalıqaralıq birge islesiw jámiyeti (GIZ) milliy wákilxanasınıń qarjılay járdeminde ótkerilmekte.
Sonıń ishinde, 180 kreditlik “Densawlıqtı saqlawdı basqarıw hám jámiyetlik densawlıqtı saqlaw sistemasın qarjılandırıw transformaciyası tiykarları” integraciyalıq ulıwma mamanlıq arttırıw oqıw kursı gibrid, yaǵnıy, kúndizgi + aralıqtan + kóshpeli tártipte ótkeriliwi rejelestirilgen. Baǵdarlamanıń pilot basqıshında birinshi oqıw kursı usı jıldıń noyabr ayında Qaraqalpaqstan Respublikası Densawlıqtı saqlaw ministrliginiń 30 basshı xızmetker, emlew-profilaktikalıq mákemeleriniń basshıları, bas esapshıları ushın ótkerilmekte.
Oqıw kursınıń birinshi háptesi dawamında sabaqlar Medicina xızmetkerleriniń kásiplik mamanlıǵın rawajlandırıw orayınıń “Jámiyet salamatlıǵı hám densawlıqtı saqlawdı basqarıw” kafedrası negizinde ótkerilgen bolsa, ekinshi-úshinshi oqıw hápteleriniń sabaqları aralıqtan turıp ótkerildi. Tórtinshi oqıw háptesiniń sabaqları bolsa, kóshpeli tártipte Nókis qalasında ótkerilmekte.
Milliy densawlıqtı saqlaw sisteması, onıń quramı hám qarjılandırılıwın transformaciyalawǵa tiyisli modulleri boyınsha sabaqlardı Medicina xızmetkerleriniń kásiplik qánigeligin rawajlandırıw orayınıń “Jámiyetlik salamatlıq hám densawlıqtı saqlawdı basqarıw” kafedrasınıń professor hám oqıtıwshıları (professorlar D.Asadov, X.Rustamova, N.Narmuxamedova, docentler X.Asadov, V.Hakimov, A.Hamraev, T.Aripov, oqıtıwshılar S.Abduraximova, Sh.Abbasxanova) ótken bolsa, xalıqaralıq tájiriybege tiyisli moduller sabaqların Germaniya xalıqaralıq birge islesiw jámiyeti (GIZ) milliy wákilxanası tárepinen tartılǵan xalıqaralıq (Olav Goyc, Anna Kristin Xanser) hám milliy ekspertler (S.Saliev, R.Azimov) alıp barmaqta.
Oqıw kursı dawamında tıńlawshılar tárepinen ózlestirilip atırǵan maǵlıwmatlar hám ámeliy kónlikpeler basqarıp atırǵan mákemeleriniń jumısın sistema transformaciyası principlerine sáykes túrde shólkemlestiriwge ámeliy járdem beredi.
Pilot aymaq bolǵan Qaraqalpaqstan Respublikası ushın ótkerilip atırǵan oqıw baǵdarlamasınıń nátiyjelerine baǵıshlanǵan tallawda ulıwma reje kestege muwapıq respublikanıń basqa aymaqları ushın 2026-jılı ótkeriletuǵın oqıw baǵdarlamaları sabaqlarınıń bir bólegin Qaraqalpaqstan Respublikasında ótkeriwdi shólkemlestiriw máselesi de talqılandı.
Sonıń menen birge, Medicina xızmetkerleriniń kásiplik mamanlıǵın rawajlandırıw orayınıń “Jámiyet salamatlıǵı hám densawlıqtı saqlawdı basqarıw” kafedrasınıń xızmetkerleri V.Hakimov, A.Hamraev, Qaraqalpaqstan Respublikası Densawlıqtı saqlaw ministri M.Qurbanov hám Qaraqalpaqstan medicina institutınıń rektorı O.Xalimov arasında 2025-jıl 27-noyabr kúni ótkerilgen sóylesiwlerde sistema ushın basqarıw xızmetkerlerin tayarlawdıń jańa mexanizmlerin engiziw máseleleri talıqlanıp, birge islesiw baǵdarları belgilep alındı.

Qaraqalpaqstan xabar agentligi