Xalıq hám sociallıq taraw obektlerin úzliksiz elektr energiyası menen támiyinlew, ásirese, gúzgi-qısqı máwsimde elektr tarmaqlarındaǵı úzilislerdi saplastırıw áhmiyetli másele bolıp esaplanadı. Bul baǵdarda Nızamshılıq palatasına xalıq wákillerinen bir qatar múrájatlar kelip túspekte.

Parlamenttiń tómengi palatasınıń májilisinde Ózbekstan Respublikası energetika ministri J.Mirzamahmudovtıń “Energiya támiynatınıń turaqlılıǵın támiyinlew, xalıqqa xızmet kórsetiwdiń sapasın jaqsılaw hám gúzgi-qısqı máwsimge tayarlıq boyınsha ámelge asırılǵan jumıslar haqqında”ǵı málimlemesin tıńlaw haqqındaǵı másele kórip shıǵıldı.
Atap ótilgenindey, mámleketimizde energetika tarawın jedel rawajlandırıw, energiyanı únemlew, onnan aqılǵa uǵras paydalanıw, xalıq hám ekonomika tarmaqların turaqlı, úzliksiz hám sapalı elektr energiyası menen támiyinlew, xalıqqa kórsetilip atırǵan xızmetlerdiń sapasın arttırıw baǵdarında keń kólemli jumıslar ámelge asırılmaqta. Tarawdıń huqıqıy tiykarları jetilistirilip barılmaqta.
Sonıń menen birge, Oliy Majlis Nızamshılıq palatasınıń deputatları tárepinen orınlarǵa shıǵıp úyreniwler procesinde tutınıwshılarǵa sapalı hám úzliksiz elektr energiyasın jetkerip beriwge baylanıslı ayırım máseleler baqlanbaqta.
Deputatlar tárepinen energiya támiynatındaǵı mashqalalar, olardı saplastırıw boyınsha kórilip atırǵan ilajlar, tarawǵa engizilip atırǵan jańalıqlar, infrastrukturanı modernizaciyalaw hám xalıqqa xızmet kórsetiw procesin jetilistiriw boyınsha ámelge asırılǵan jumıslardıń jaǵdayın dodalaw zárúr ekenligi atap ótildi. Sonnan kelip shıǵıp, energetika ministriniń málimlemesin tıńlaw boyınsha qarar qabıl etildi.

ÓzA