Oliy Majlis Nızamshılıq palatasınıń májilisinde “2026-jıl ushın Ózbekstan Respublikasınıń Mámleketlik byudjeti haqqında”ǵı nızam joybarı birinshi oqıwda kórip shıǵılmaqta. Nızam joybarı boyınsha Bas ministrdiń orınbasarı – ekonomika hám qarjı ministri J.Qwchqorov bayanat etpekte.

Atap ótilgenindey, nızam joybarında Ózbekstan ekonomikasında jalpı ishki ónimniń real ósiw páti 2026-jılı 6,6 procentke artıp, xalıqtıń jan basına 4 mıń 26 dollardı quraytuǵını názerde tutılmaqta. Ósiw pátleri bolsa sanaatta 6,4 procent, awıl xojalıǵında 4,2 procent, bazar xızmetlerinde 14,5 procent, qurılısta 10,2 procent bolıwı prognoz etilgen.
Inflyaciya dárejesi kórsetkishi kemeyiwi kútilmekte. Atap aytqanda, 2024-jıldaǵı 9,8 procentten 7,5 procentke tómenlewi kútilmekte.
Sonıń menen birge, 2026-jılı konsolidaciyalasqan byudjet dáramatlarınıń prognozı 515,4 trillion sum, qárejetleriniń prognozı 567 trillion sum muǵdarında, konsolidaciyalasqan byudjet deficiti jalpı ishki ónimge salıstırǵanda 3,0 procent, sırtqı qarızdıń sheklengen kólemi usı jılǵa salıstırǵanda azayıp, 5 milliard AQSh dolları muǵdarında belgilew názerde tutılǵan. Usı jılı mámleketlik sırtqı qarızdıń sheklengen muǵdarı 5,5 milliard etip belgilengen edi.
Xızmetler tarawında joqarı bilim hám texnologiyalardı rawajlandırıw, atap aytqanda, jasalma intellekt tiykarında programmalıq joybarlar hám kórsetilgen xızmetler kólemin 10 million dollardan 200 million dollarǵa shekem kóteriw ilajları kóriledi.
Turizm potencialı joqarı bolǵan 150 máhállede infrastrukturanı jaqsılawǵa 5 mıń joybardı iske qosıw rejelestirilgen.
Elektr energiyasın islep shıǵarıwda qosımsha quwatlıqlar jaratıladı. 250 máhállede 350 sanaat joybarı, 50 máhállede mikro sanaat orayları shólkemlestiriledi.

ÓzA