3-dekabr – Xalıqaralıq mayıplar kúni múnásibeti Nókis qalasında “Imkaniyattı ózimiz jaratamız!” tańlawınıń jeńimpazların sıylıqlaw máresimi bolıp ótti.

Ózbekstan Jurnalistler awqamı Qaraqalpaqstan bólimi, Berdaq atındaǵı Qaraqalpaq mámleketlik universiteti jurnalistika kafedrası janında shólkemlestirilgen “Jas jurnalistler klubı”, Ózbekstan Xalıq demokratiyalıq partiyası Qaraqalpaqstan Respublikalıq Keńesi hám “MY BEE” ilimiy-aǵartıwshılıq orayı juwapkershiligi sheklengen jámiyeti tárepinen birgelikte shólkemlestirilgen tańlawǵa joqarı oqıw orınlarınıń student-jasları, ulıwma bilim beriw mektepleriniń oqıwshıları qatnastı.
Olar fizikalıq imkaniyatı sheklengen shaxslardıń turmısı, olarǵa jaratıp berilgen sharayatlar, túrli tarawlarda qolǵa kirgizip atırǵan jetiskenliklerin sáwlelendiriwshi «Eń jaqsı videorolik», “Eń jaqsı súwret”, “Eń jaqsı ilimiy maqala” hám “Eń jaqsı gúrriń” nominaciyaları boyınsha ózleriniń dóretiwshilik islerin sınaqtan ótkerip, onda barlıq nominaciya boyınsha sociallıq tarmaq arqalı eń kóp dawısqa iye bolǵan jeńimpazlar anıqlandı.
Atap aytqanda, Ájiniyaz atındaǵı Nókis mámleketlik pedagogikalıq institutınıń magistrantı Shaxsanem Qaljanova «Eń jaqsı videorolik», Nókis qalasındaǵı 8-sanlı ulıwma bilim beriw mektebiniń oqıwshısı Gulrux Ǵanibaeva “Eń jaqsı súwret”, Qaraqalpaq mámleketlik universiteti yuridika fakultetiniń studenti Uǵılxan Bazarbaeva “Eń jaqsı ilimiy maqala”, usı universitettiń qaraqalpaq filologiyası hám jurnalistika fakultetiniń studenti Dilnoza Karamatdinova “Eń jaqsı gúrriń” nominaciyaları boyınsha jeńimpaz dep tabıldı.
Sıylıqlaw máresiminde Ózbekstan Jurnalistler awqamı Qaraqalpaqstan bóliminiń baslıǵı Dawıt Abibullaev, Ózbekstan Xalıq demokratiyalıq partiyası Qaraqalpaqstan Respublikalıq Keńesiniń bólim baslıǵı Nurlan Kıshanov jıynalǵanlardı bayram menen qutlıqlap, elimizde “Insan qádiri ushın” principi tiykarında ámelge asırılıp atırǵan keń kólemli ilajlarǵa toqtap ótti.
Jeńimpazlar Ózbekstan Xalıq demokratiyalıq partiyası Qaraqalpaqstan Respublikalıq Keńesi, “MY BEE” ilimiy-aǵartıwshılıq orayı juwapkershiligi sheklengen jámiyeti tárepinen kókirek belgisi, statuetka, diplom hám estelik sawǵaları menen sıylıqlandı. Sonday-aq, bunnan basqa da mayıplıǵı bolǵan balalarǵa “MY BEE” ilimiy-aǵartıwshılıq orayı juwapkershiligi sheklengen jámiyetiniń sawǵaları tapsırıldı.
Ilaj kórkem óner xızmetkerleri hám mayıplıǵı bolǵan shaxslar tárepinen atqarılǵan yoshlı koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshı