Prezident Shavkat Mirziyoev 4-dekabr kúni Sırdárya wálayatına bardı. Sapardıń birinshi mánzili Sırdárya rayonındaǵı “River Med Pharm” kárxanası boldı.

Bul kárxana mámleketimizde infuzion dári quralların islep shıǵarıw boyınsha jetekshilerden biri bolıp esaplanadı. Búgingi kúnde Ózbekstanda islep shıǵarılıp atırǵan infuzion eritpelerdiń 20 procenti mine usı kárxanaǵa tuwra keledi.
Bunday dári quralları nawqas ómiri ushın eń áhmiyetli medicinalıq ónimlerdiń biri bolıp esaplanadı. Olardı tayarlaw ápiwayı tabletkalar islep shıǵarıwdan ádewir quramalı. Sebebi bul túrdegi eritpeler tikkeley qan tamırlarına jiberiledi. Demek, olar pútkilley steril sharayatta, joqarı anıqlıq hám xalıqaralıq standartlarǵa tolıq juwap beretuǵın halda islep shıǵarılıwı shárt.
Joybardıń ulıwma bahası 30 million dollardan aslam bolıp, házirgi kúnde kárxanada 750 adam turaqlı jumıs penen támiyinlengen. Kárxana jılına 135 milliard sumlıq 70 túrdegi, ulıwma esapta 114 million dana dári quralların islep shıǵarmaqta. Ónimlerdiń 20 procenti eksport etilip atırǵanı kárxananıń xalıqaralıq básekige shıdamlılıǵın kórsetedi.
Noyabr ayında joybardıń ekinshi basqıshı iske qosılıp, óndirislik quwatlıqlar jáne de keńeytildi. Kárxana 30 million dana infuzion eritpeler, 70 millionnan aslam qurǵaq antibiotikler hám derlik 20 million kóz-murın tamshıların islep shıǵaradı.
Mámleketimiz basshısına kárxananıń ónimleri hám gezektegi rejeleri haqqında maǵlıwmat berildi.
Keleshekte kárxanada islep shıǵarılatuǵın ónim túrleri 200 ge jetkeriledi. Bul basqıshta shiyshe hám plastik ıdıslardaǵı inekciya ushın eritpeler, sonday-aq, tabletka hám kapsulalar islep shıǵarıw jolǵa qoyıladı. Jumıs orınlarınıń sanı mıńǵa shekem arttırıladı.
Prezidentimiz bul jerde wálayattıń belsendileri hám nuranıylar menen sóylesti.
Ekonomika, sanaat, awıl xojalıǵı, jaslar tárbiyası hám aymaqtıń keleshegine baylanıslı áhmiyetli máseleler boyınsha ashıq sáwbet boldı. Mámleketimiz basshısı adamlardaǵı intakerlik reformalardıń nátiyjesin arttırıwda sheshiwshi faktor ekenin atap ótti.
– Ózgerisler, bárinen burın, máhállelerde seziliwi kerek. Sizler adamlar menen turaqlı baylanısta bolıp, jaslarǵa durıs jol kórsetiwińiz zárúr. Hámmemiz oyaw hám belsendi bolsaq, háreketlerimiz, alıp barıp atırǵan reformalarımız álbette nátiyje beredi. Sırdáryaǵa úlken rejeler menen kelgenbiz. Sizlerdi tıńlap, másláhátlesip bul rejelerdi ámelge asıramız, – dedi Prezident.

ÓzA