Ózbekstan Respublikası Prezidenti Shavkat Mirziyoev Húkimetleraralıq komissiyanıń gezektegi májilisinde qatnasıw ushın mámleketimizge kelgen Rossiya Federaciyası Húkimeti Baslıǵınıń birinshi orınbasarı Denis Manturov basshılıǵındaǵı delegaciyanı qabılladı.

Ushırasıwda Rossiyanıń Nijniy Novgorod hám Omsk wálayatları, Bashqurtstan hám Krasnoyarsk úlkesiniń basshıları da qatnastı.
Sóylesiw aldında joqarı mártebeli miyman mámleketimiz basshısına Rossiya Prezidenti Vladimir Putinniń qızǵın sálemin hám eń jaqsı tileklerin jetkerdi.
Joqarı dárejedegi ushırasıwlardıń nátiyjeleri boyınsha erisilgen kelisimlerdiń qabıl etilgen “jol kartası” tiykarında ámelge asırılıwı dodalandı.
Sawda kólemi turaqlı ósip atırǵanı, sanaat, energetika, transport, metallurgiya, ximiya hám basqa da tarawlarda birgeliktegi joybarlar ámelge asırılıp atırǵanı qanaatlanıwshılıq penen atap ótildi.
Tovar almasıw pátin saqlap qalıw, ekonomikanıń tiykarǵı tarmaqlarında, sonıń ishinde, sanaat zonaları sheńberindegi kooperaciya joybarların jedellestiriw, aymaqlar hám biznes dárejesinde jedel birge islesiw baylanısların dawam ettiriw boyınsha muwapıqlastırılǵan ilajlar kóriw áhmiyetli ekeni atap ótildi.
Usı mánide, Tashkentte bolıp ótken Húkimetleraralıq komissiyanıń májilisi hám isbilermenlik ilajlarınıń nátiyjeleri joqarı bahalandı.
Sonday-aq, ushırasıw sheńberinde Rossiyanıń jetekshi kompaniyalarınıń basshıları Prezidentimizge málimleme texnologiyaları, energetika, elektrotexnika, mashina qurılısı, ximiya, farmacevtika, toqımashılıq hám azıq-awqat sanaatında joybarlardı ámelge asırıw boyınsha anıq rejelerdi tanıstırdı.

ÓzA