Usı jıldıń 3-dekabr kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaev Nókis qalasınan derlik 230 kilometr qashıqlıqta jaylasqan Ellikqala rayonındaǵı «Shuqırqaq» awılına bardı hám elatta puqaralar menen ushırasıp, jaqınnan sáwbetlesti.

Onda dáslep, sońǵı jılları elimizde Prezidentimizdiń basshılıǵında xalqımızdıń turmıs abadanlıǵın támiyinlew baǵdarında ámelge asırılıp atırǵan keń kólemli iygilikli jumıslarǵa ayrıqsha toqtap ótildi.
Bunnan soń, aymaq turǵınlarınıń mashqalaları tıńlandı. Tiykarınan, awıl xalqına medicinalıq xızmet kórsetiwdi jaqsılaw, kem támiyinlengen shańaraqlardıń turaq jayların shiferlap beriw, rayon orayına barıwshı transport qatnawın tiklew, suwdı filtrden ótkeriwshi EKOS jumısın jaqsılaw sıyaqlı máseleler kóterildi.
Barlıq bildirilgen múrájatlarǵa unamlı sheshim tabıw boyınsha juwapkerlerge anıq tapsırmalar berildi.
Bunnan soń, «Jasıl mákan» akciyası menen dawam etip atırǵan gúzgi terek egiw jumısları sheńberinde jaqsı niyetler menen mektep aldına terek nálleri egildi.
Joqarǵı Keńes Baslıǵı awıllıq shıpakerlik punkti, sonday-aq, balalar baqshası jumısları menen de jaqınnan tanıstı.
Awıl xalqın ishimlik suwı menen támiyinlewshi suwdı filtrden ótkeriwshi EKOS jaǵdayı da kózden ótkerilip, júzege kelgen mashqalanı sheship beriw boyınsha juwapkerlerge tapsırmalar berildi.

Qaraqalpaqstan xabar agentligi