Berdaq atındaǵı Qaraqalpaq mámleketlik universitetinde 3-dekabr – Xalıqaralıq mayıplar kúni múnásibeti menen sociallıq birge islesiw hám jaqsılıqtı úgit-násiyatlawshı “Mehirge tolsın kewiller” atamasındaǵı qayırqomlıq koncert baǵdarlaması shólkemlestirildi. Ilaj Nókis qalalıq mádeniyat bólimine qaraslı 6-sanlı “Doslıq” mádeniyat orayı dógerek qatnasıwshıları menen birgelikte ótkerilip, onda universitettiń student-jasları da qatnastı.

Onda universitettiń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov shıǵıp sóylep, ótkerilip atırǵan bul ilaj jámiyette miyrim-shápáát, keńpeyillik hám adamgershilik pazıyletlerin jáne de joqarılatıwǵa xızmet etetuǵının atap ótti. Sonday-aq óz sózinde mámleketimiz tárepinen mayıplıǵı bolǵan shaxslarǵa jaratılıp atırǵan imkaniyatlar, olardı qollap-quwatlawǵa qaratılǵan sociallıq baǵdarlamalarǵa toqtap ótip, universitet jámááti de bul baǵdarda turaqlı túrde iygilikli jumıslardı ámelge asırıp atırǵanın mısallar menen kórsetip ótti.
Bunnan soń, ilaj qatnasıwshılarına “Doslıq” mádeniyat orayı dógerek qatnasıwshıları tárepinen koncert baǵdarlaması qoyıp berilip, onda atqarılǵan qosıq namalar, ayaq oyınlar, saxnalıq kórinisler hám kórkem shıǵıwlar jıynalǵanlarda úlken tásir qaldırdı.

Qaraqalpaqstan xabar agentligi