Ózbekstan mámleketlik denetárbiyası hám sport universiteti Nókis filialında Ózbekstan Respublikası Konstituciyası qabıl etilgenliginiń otız úsh jıllıǵı múnásibeti menen bayram ilajı bolıp ótti.

Onda Qaraqalpaqstan Respublikası Konstituciyalıq baqlaw komiteti baslıǵınıń orınbasarı Sherzod Ibragimov, Qaraqalpaqstan Respublikası Joqarǵı Keńesiniń deputatı Qoshqarbay Sadıkov hám Qaraqalpaqstan Respublikası prokurarturasınıń bólim prokurorı Nizombek Yuldashev, professor-oqıtıwshılar hám student-jaslar qatnastı.
Saltanatlı keshe Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajdı filial direktorının jaslar maseleleri hám ruwxıylıq-aǵartıwshılık isleri boyınsha birinshi orınbasarı Gúlmurat Xojametov kiris sóz benen ashıp berdi.
Onda shıǵıp sóylegen taraw wákilleri filial jámáátin Ózbekstan Respublikası Konstituciyasınıń qabıl etilgenliginiń 33 jıllıǵı menen qızǵın qutlıqlap, elimizdiń dúnya siyasiy maydanında ǵárezsiz mámleket sıpatında óz ornına iye bolıwı, rawajlanıw jolın belgilep, jıldan-jılǵa abırayınıń artıp barıwı tikkeley bas Nızamımızǵa baylanıslı ekenligin atap ótti. Ásirese, xalıqtıń abadanlıǵın támiyinlewde – Konstituciyanıń ornı hám áhmiyeti joqarı ekenligi, mámlekettiń keleshegi usı hújjette óz sáwleleniwin tapqanlıǵına toqtaldı.
– Búgin elimizde júz berip atırǵan jańalanıwlar, demokratiyalıq huqıqıy mámleket qurıw, puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı, – deydi Qaraqalpaqstan Respublikası Joqarǵı Keńesiniń deputatı Qoshqarbay Sadıkov. – Tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıqları menen erkinliklerin belgilewde áhmiyetli hújjet bolıp esaplanadı.
Saltanatlı bayram ilajı filial studentleri tárepinen tayarlanǵan koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshı