Mámleketimizdiń Tiykarǵı nızamına bola, Ózbekstan Respublikası Konstituciyası hám nızamlarınıń ústinligi sózsiz tán alınadı. Óz gezeginde, áyne Bas nızamımız nızam ústinliginiń áhmiyetli kepili bolıp esaplanadı.

Jáhán ekonomikası hám diplomatiya universiteti docenti Zarina Isroilova bul haqqında pikir bildirdi:
– Bas nızamımızda Konstituciya hám nızamnıń ústinligi haqqında óz aldına bap kirgizilgen.
Ózbekstan Respublikası Konstituciyası mámlekettiń pútkil aymaǵında joqarı yuridikalıq kúshke iye, tikkeley ámel etedi hám birden-bir huqıqıy mákannıń tiykarın quraydı.
Ózbekstan Respublikasınıń xalıqaralıq shártnamaları xalıqaralıq huqıqtıń ulıwma tán alınǵan princip hám normaları menen bir qatarda Ózbekstan Respublikası huqıqıy sistemasınıń quramlıq bólegi bolıp esaplanadı.
Eger Ózbekstan Respublikasınıń xalıqaralıq shártnamasında Ózbekstan Respublikasınıń nızamında názerde tutılǵanınan basqasha qaǵıydalar belgilengen bolsa, Ózbekstan Respublikasınıń xalıqaralıq shártnaması qaǵıydaları qollanıladı.
Mámleket hám onıń uyımları, basqa da shólkemler, lawazımlı shaxslar, puqaralıq jámiyeti institutları hám puqaralar Konstituciya hám nızamlarǵa muwapıq jumıs alıp baradı.
Usı bapta kepillep qoyılǵan principler “Ózbekstan – huqıqıy mámleket” degen ideyanıń tiykarın quraydı. Haqıyqatında da, huqıqıy mámlekette barlıq tarawlarda, bárinen burın, nızamlı tiykarlarǵa súyengen halda jumıs alıp barıladı. Bul nızamlı tiykarlar bolsa Bas nızamımızdan baslanadı hám, óz gezeginde, onıń ózi kepil bolıp xızmet etedi.
Prezidentimizdiń atap ótkenindey, “Biz keyingi waqıtlarda “Nızam – muqaddes, hár qanday jaǵdayda da ádillikti ornatıw shárt!” degen iygilikli principti jámiyettiń hár bir aǵzası, ásirese, lawazımlı shaxslar ushın turmıslıq qaǵıydaǵa aylandırıw baǵdarında sistemalı jumıslar ámelge asırılmaqta.
Mámleketimiz basshısınıń 2023-jıl 8-maydaǵı “Jańa redakciyadaǵı Ózbekstan Respublikası Konstituciyasın ámelge asırıw boyınsha birinshi gezektegi ilajlar haqqında”ǵı pármanında jańa redakciyadaǵı Konstituciya joqarı yuridikalıq kúshke iye ekenliginen kelip shıǵıp, mámleketlik uyımlar hám shólkemler, sonıń ishinde, sud hám huqıq qorǵaw uyımlarınıń jumısında tikkeley hám sózsiz qollanılıwı belgilengen.
Usı párman tiykarında barlıq nızam hújjetleri jańa redakciyada qabıl etilgen Konstituciyaǵa muwapıqlastırıldı. Usı párman menen “Jańa redakciyadaǵı Ózbekstan Respublikası Konstituciyasınan kelip shıǵatuǵın wazıypalardı ámelge asırıw boyınsha ilajlar baǵdarlaması” tastıyıqlandı.
2025-jıl 21-noyabrdegi “Ózbekstan Respublikası Konstituciyası kúni bayramına tayarlıq kóriw hám onı ótkeriw haqqında”ǵı Prezident biyliginde Ózbekstan Respublikası Konstituciyasınıń otız úsh jıllıǵın múnásip kútip alıw hám joqarı dárejede belgilew, puqaralardı onda belgilengen iygilikli qádiriyatlar átirapında birlestiriw, “Konstituciya – insan qádiri, erkinlik, teńlik hám ádillik girewi!” degen bas ideyanı ózinde jámlegen ruwxıy-aǵartıwshılıq hám basqa da ilajlardı nátiyjeli shólkemlestiriw belgilendi.
Sonnan kelip shıǵıp ámelge asırılıp atırǵan ilajlarda da Konstituciyada belgilengen xalıq hákimiyatı, insan qádiri, erkinlik hám teńlik, sociallıq ádillik hám awızbirshilik sıyaqlı iygilikli ideyalar elimizde ámelge asırılıp atırǵan reformalarda óz kórinisin tawıp atırǵanı kórsetip berilmekte.
Atap aytqanda, Jáhán ekonomikası hám diplomatiya universitetinde Konstituciya sabaqları shólkemlestirilip, onda Konstituciya tiykarında insan huqıqları menen erkinlikleri tarawında pútkilley jańa basqıshqa ótilgeni ashıp berilmekte.
Bunday ilajlar jaslardıń qálbinde mámlekettiń Tiykarǵı nızamına húrmet sezimin qáliplestiriw menen birge, insan huqıqlarına ámel etiw, onı ámelde támiyinlew sıyaqlı huqıqıy mádeniyattı qáliplestiredi.

N.Abduraimova,ÓzA