Ózbekstannıń 2026-2028-jıllar ushın orta múddetli makroekonomikalıq prognozlar hám pul-kredit siyasatınıń tiykarǵı baǵdarları mámleket ekonomikasınıń sırtqı hám ishki sharayatların esapqa alǵan halda islep shıǵıldı.

Bul haqqında Oraylıq bank málim etti.
Sırtqı ortalıqtan kelip shıǵatuǵın qáwip-qáterler arasında jáhán ekonomikasındaǵı anıqsızlıqlar sebepli globallıq ósiw salıstırmalı tómen bolıp qalıwı, inflyaciya boyınsha maqsetli kórsetkishlerge erisiwdiń uzaǵıraq dawam etiwi, valyuta bazarlarında keskin ózgerisler baqlanbawı hám altın bahalarınıń joqarı dárejede saqlanıwı prognoz etilmekte.
Ishki ortalıqta bolsa, tiykarǵı scenariyge bola, jalpı talap basqıshpa-basqısh turaqlasadı. Kreditler ósiwi normallasadı. Miynet ónimdarlıǵına sáykes ráwishte miynet haqı artadı. Pul ótkermeleri orta múddetli traektoriyaǵa qaytadı. Investiciyalardıń turaqlı aǵımı támiyinlenedi.
Tiykarǵı scenariy boyınsha JIÓniń real ósiwi, 2026-jılı 5,5-6,5 procent, 2027-2028-jıllarda 6-7 procentke ósiwi prognoz etilmekte.
Oraylıq bank 2027-jıldıń aqırına shekem inflyaciyanıń 5 procentlik maqsetli kórsetkishin támiyinlewge itibar qaratpaqta. 2026-jıldıń aqırına shekem inflyaciya 7 procentke shekem tómenlewi, 2027-jılı 5 procentlik targetke jetiwi hám 2028-jıldan baslap usı dárejede qáliplesiwi kútilmekte. Bul prognozlar, menshiklestiriw processleriniń dawam etiwi, ishki hám sırtqı investiciyalar kóleminiń turaqlı ósiwi, klimat penen baylanıslı qáwiplerdiń kúsheymewi sıyaqlılarǵa tiykarlanǵan.
Birge islesiwshi mámleketler valyuta kursınıń keskin qádirsizleniwi, altın bahalarınıń sezilerli dárejede tómenlewi, import etiletuǵın azıq-awqat ónimleri jáhán bahalarınıń sezilerli dárejede artıwı, fiskal deficittiń keńeyiwi, energiya támiynatındaǵı úzilisler inflyaciyaǵa tásir etiwi múmkin.
Sonday-aq, hawa-rayı hám klimat sharayatlarınıń jamanlasıwı, finanslıq inklyuzivlik arqalı tutınıw talabınıń artıwı hám tártipke salınatuǵın bahalardıń kútilgeninen joqarı dárejede kóteriliwi de inflyaciyaǵa tásir etiwi múmkin.
Sonday-aq, inflyaciyanıń tómenlewine alıp keliwi múmkin bolǵan shoklar arasında, altın bahasınıń keskin artıwı, menshiklestiriw processleriniń tezlesiwi, investiciya hám báseki ortalıǵınıń jaqsılanıwı názerde tutılǵan.
Bunday jaǵdayda pul-kredit siyasatı orta múddetli perspektivada inflyaciyanıń 5 procentlik maqsetli kórsetkishin támiyinlewge qaratılǵan tárizde ámelge asırıladı.

Sh.Mamaturopova, ÓzA