Oliy Majlis Senatı Baslıǵınıń birinshi orınbasarı Sodiq Safoev Rossiya Federaciyası Federal Májilisi Federaciya Keńesi Federaciyalıq struktura, regionallıq siyasat, jergilikli ózin-ózi basqarıw hám Arqa isleri komitetiniń baslıǵı Andrey Shevchenko menen ushırastı.

Sóylesiw waqtında Ózbekstan hám Rossiya arasındaǵı strategiyalıq sheriklik izbe-iz bekkemlenip atırǵanı, ásirese, eki mámleket Prezidentleri arasındaǵı turaqlı sóylesiw birge islesiwdiń barlıq baǵdarlarında pát arttırıp atırǵanı atap ótildi.
Sonday-aq, regionlararalıq baylanıslardıń jedellesiwi eki tárepleme qatnasıqlardı ámeliy mazmun menen bayıtıp atırǵanı ayrıqsha atap ótildi.
Ushırasıwda eki mámlekettiń nátiyjeli parlamentleraralıq sóylesiwiniń házirgi dárejesi joqarı bahalandı. Sonıń ishinde, usı jılı Qazan qalasında Ózbekstan Oliy Majlisi Senatı hám Rossiya Federal Májilisi Federaciya Keńesi arasındaǵı birge islesiw boyınsha komissiyanıń onınshı májilisi ótkerilip, bilimlendiriw, sanlastırıw, miynet migrantlarınıń huqıqların qorǵaw, turizm, aviaqatnawlar hám jaslar siyasatı boyınsha áhmiyetli kelisimlerge erisilgeni atap ótildi.
Eki mámleket arasında mádeniy-gumanitarlıq baylanıslar da barǵan sayın rawajlanıp barmaqta. 2024-jılı Moskvada ótkerilgen “Ózbekstan mádeniyatı kúnleri,” Ekinshi jer júzilik urıstaǵı Jeńistiń 80 jıllıǵı múnásibeti menen Ózbekstanda ámelge asırılǵan keń kólemli ilajlar jáne turizm tarawındaǵı unamlı dinamika bunı ayqın tastıyıqlaytuǵını atap ótildi.
Ushırasıw juwmaǵında Ózbekstan hám Rossiya arasındaǵı strategiyalıq sheriklik hám parlamentleraralıq sóylesiwdi jáne de bekkemlewge kelisip alındı.

Qaraqalpaqstan xabar agentligi