Ózbekstan Respublikası Prezidenti “Ózbekstanda finanslıq texnologiyalar tarawın bunnan bılay da rawajlandırıw ilajları haqqında” qarar qabıl etti.

Oǵan muwapıq, 2026-2030-jıllarda finanslıq texnologiyalar tarawın rawajlandırıwdıń tiykarǵı maqsetli kórsetkishleri etip tómendegiler belgilendi:
a) finanslıq texnologiyalar tarawındaǵı startaplarǵa 1 milliard AQSh dolları muǵdarında sırt el investiciyaların tartıw;
b) finanslıq texnologiyalar bazarı qatnasıwshılarınıń sanın keminde 200 ge jetkeriw;
v) finanslıq texnologiyalar tarawındaǵı inkubaciya hám akseleraciya baǵdarlamalarınan ótken startaplardıń sanın 100 ge jetkeriw;
g) finanslıq texnologiyalar baǵdarında keminde 5 mıń jastı oqıtıw;
d) tólem quralı sıpatında cifrlı valyutalardı hám milliy yamasa sırt el valyutası menen támiyinlengen tokenlerdi tájiriybe-sınaqtan ótkeriw.
Qararǵa bola, Oraylıq bank finanslıq texnologiyalar tarawın rawajlandırıwǵa juwapker.
Oraylıq bank janında tómendegiler shólkemlestiriledi:
a) juwapkershiligi sheklengen jámiyet túrinde ustav qorı 50 million AQSh dolları ekvivalentine teń bolǵan startap joybarlardı qarjılandıratuǵın venchur fondı;
b) finanslıq texnologiyalar tarawındaǵı startaplar ushın tómendegi xızmetlerdi ámelge asıratuǵın yuridikalıq shaxs statusına iye bolmaǵan innovaciyalıq xab:
inkubaciya hám akseleraciya baǵdarlamaların ámelge asırıw hám sırtqı bazarlarǵa shıǵıwǵa járdem kórsetiw;
jergilikli hám sırt el venchur investiciyaların tartıwǵa kómeklesiw; grant baǵdarlamaların ámelge asırıw.
2026-jıl 1-yanvardan baslap innovaciyalıq xab qatnasıwshılarına tómendegi qárejetler qaplap beriledi:
finanslıq texnologiyalar baǵdarındaǵı kurslarda oqıw hám sertifikat alıwǵa baylanıslı qárejetlerdiń 50 procentine shekemgi bólegi, biraq 20 mıń AQSh dolları ekvivalentinen aspaǵan muǵdarda;
inkubaciya hám akseleraciya baǵdarlamaların ámelge asırıwshı isbilermenlik subektleriniń finanslıq texnologiyalar tarawındaǵı startap joybarlarına mentorlar hám trenerlerdi tartıwǵa baylanıslı qárejetlerdiń 50 procentke shekemgi bólegi, biraq 50 mıń AQSh dolları ekvivalentinen aspaǵan muǵdarda;
b) innovaciyalıq xab qatnasıwshılarına tiyisli norma hám talaplar Oraylıq bank tárepinen belgilenedi;
v) 2026-jıldan baslap hár jılı Oraylıq bank tárepinen Sanlı texnologiyalar ministrligi hám basqa da mápdar uyımlar menen birgelikte finanslıq texnologiyalar tarawında bar bolǵan innovaciyalıq sheshimlerdi hám ámelge asırılǵan jumıslardı keńnen úgit-násiyatlaw, sırt el investiciyaların tartıw jáne xalıqaralıq birge islesiwdi keńeytiwge baylanıslı finanslıq texnologiyalar tarawında xalıqaralıq forumlar shólkemlestiriledi.
2026-jıl 1-sentyabrge shekem bankler, tólem shólkemleri hám finanslıq texnologiyalar bazarı qatnasıwshıları arasında qáwipsiz hám standartlastırılǵan maǵlıwmat almasıwdı támiyinleytuǵın “ashıq banking” sisteması engiziledi.
2026-jıl 1-yanvardan baslap tólem quralı sıpatında turaqlı tokenler aylanısın tártipke salıwdıń arnawlı huqıqıy rejimi engiziledi. Bunda:
a) maǵlıwmatlardıń bólistirilgen reestri texnologiyası tiykarında jumıs alıp baratuǵın tólem sistemasın jaratıw boyınsha pilot joybarlar ámelge asırıladı;
b) “tartibka solish qumdoni” rejimin engiziw tártibi hám onıń ámel etiw múddeti Perspektivalı joybarlar milliy agentligi tárepinen Oraylıq bank penen birgelikte belgilenedi.
2026-jıl 1-yanvardan baslap:
a) Ózbekstan Respublikası rezidentleri bolǵan yuridikalıq shaxslar tárepinen tokenlestirilgen akciya hám obligaciyalardı emissiyalawǵa ruqsat beriledi;
b) Ózbekstan Respublikası aymaǵında birja jumısın ámelge asırıw ushın belgilengen tártipte licenziya alǵan fond birjalarında tokenlestirilgen akciya hám obligaciyalardı jaylastırıw jáne olardıń aylanısı ushın óz aldına sawda maydanshası shólkemlestiriledi.

ÓzA