Qaraqalpaqstan Respublikası Bajıxana basqarmasınıń juwapker xızmetkerleri tárepinen sırt el investiciyalıq joybarlarınıń ózlestiriw jaǵdayı, “bajıxana aymaǵında qayta islew” rejimine jaylastırılǵan tovarlardı eksportqa shıǵarıw boyınsha ámelge asırılıp atırǵan jumıslar hám import etilgen úskenelerdi iske qosıw baǵdarlarındaǵı máseleler orınlarǵa shıqqan halda úyrenildi.

Olar Ellikqala rayonında jaylasqan bir qatar isbilermenlik subektlerinde, atap aytqanda, “Ellikqala altın talshıǵı klasteri”, “Bostan Denim”, “Bostan klaster” JShJ kárxanalarında boldı. Bul kárxanalardıń jumısı úlken sırt el investiciyaları tartılǵan halda iske qosılǵan.
“Ellikqala altın talshıǵı klasteri” JShJ kárxanasına 17,5 milliard sumlıq sırt el investiciyası tartılıwı nátiyjesinde 250 jańa jumıs ornı jaratıldı. Házirgi waqıtta bul kárxana iske qosılǵan bolıp, jılına 5 million AQSh dolları bahasındaǵı tayar tekstil ónimlerin eksportqa baǵdarlaw rejelestirilgen.
Usı aymaqta jaylasqan “Bostan Denim” JShJ kárxanası házirgi kúnde tayar tekstil ónimlerin islep shıǵarıp, 2 million 300 mıń AQSh dolları bahasındaǵı 1018 tonna ónim eksportqa baǵdarlanǵan. Sonday-aq, “Bostan klaster” JShJ da usı rayonda jaylasqan bolıp, házirgi waqıtta tayar gezlemelerge reń beriw menen shuǵıllanıp kelmekte.
Isbilermenlerge alıp kelinip atırǵan shiyki zatlardı “bajıxana aymaǵında qayta islew” bajıxana rejimi astına jaylastırıw usınıs etilip, onıń imkaniyatlarınan paydalanıw abzallıqları tolıq túsindirildi. Bunda alıp kelingen boyaw hám basqa da shiyki zatlardı qayta islew nátiyjesinde alınǵan tovarlardıń eksportı ámelge asırılǵanda, alıp kelingen tovarlar bajıxana tólemlerinen azat etiliwi mısallarda kórip shıǵıldı.

Qaraqalpaqstan xabar agentligi