“Salıqlardıń jıynalıw dárejesin arttırıw hám belsendi salıq tólewshilerdi xoshametlew ilajları haqqında”ǵı Prezident qararı qabıl etildi.

Qararǵa bola, 2026-jıl 1-yanvardan “Eń jaqsı salıq tólewshi máhálle” nominaciyası engiziledi.
Jeńimpazlar tómendegi normalar boyınsha anıqlanadı:
– hár 1000 xalıqqa tuwra keletuǵın kishi biznes subektleriniń sanı;
– hár 1000 xalıqqa tuwra keletuǵın kishi biznes subektleri tárepinen tólengen salıqlar muǵdarı;
– hár 1000 xalıqqa tuwra keletuǵın fizikalıq táreplerden alınatuǵın dáramat salıǵı tólewshilerdiń sanı;
– hár 1000 xalıqqa tuwra keletuǵın ózin-ózi bánt etken puqaralardıń sanı hám olar tárepinen tólengen salıqlardıń muǵdarı;
– máhálle puqaraları tárepinen múlk hám jer salıqlarınıń tólengenlik dárejesi.
“Eń jaqsı salıq tólewshi máhálle” nominaciyası jeńimpazları ushın tómendegi xoshametlew ilajları engiziledi:
– baslamalı byudjet sheńberinde izbe-iz 2 márte jeńimpaz dep tabılǵan máhálleler ushın gezektegi 2 máwsim sheńberinde joybar kirgiziw imkaniyatın sheklew qaǵıydası qollanılmaydı;
– joybarlardı sheriklik tiykarında qarjılandırıwda usı máhállelerdiń xalqı tárepinen joybar bahasınıń 25 procenti qarjılandırılǵan jaǵdayda, joybar jeńimpaz dep tabıladı hám qalǵan 75 procenti Mámleketlik byudjetten qarjılandırıladı;
belgilengen ólshemler tiykarında hár jılı birinshi 100 likke kirgen eń jaqsı salıq tólewshi máhállelerdiń hár birine Mámleketlik byudjetten 2 mlrd sum muǵdarında qarjı tiyislisinshe Máhálleniń sociallıq-ekonomikalıq mashqalaların sheshiw qorına ajıratıladı, – dep málimleme beredi xabar.uz saytı.

Qaraqalpaqstan xabar agentligi