Ózbekstan Respublikası investiciyalar, sanaat hám sawda ministri Laziz Qudratov “UzOman” investiciyalıq kompaniyasınıń bas atqarıwshı direktorı Umar Bahrom menen gezektegi jańa joybardıń shólkemlestiriwshilik tárepin hám processti tártipke salıw máselesin dodaladı.

Oman Sultanlıǵında dizimnen ótken bul kárxana elimizde jańa bank shólkemlestiriwdi rejelestirmekte.
Tárepler Ózbekstan – Oman investiciyalıq birge islesiwi izbe-iz rawajlanıp atırǵanı, sońǵı jıllarda óz-ara baylanıslar jedel ósiw pátin kórsetip atırǵanına itibar qarattı. Sóylesiw dawamında “UzOman” qatnasıwında ámelge asırılıp atırǵan basqa da joybarlar boyınsha pikir alısıldı.
Sonday-aq, birgeliktegi ilajlardıń nátiyjeliligin arttırıw, ámeliy baslamalardıń kólemin keńeytiw zárúr ekenligi atap ótildi. Ulıwmalıq háreketler tárepler ushın jańa joybarlardı alǵa qoyıw, óz-ara investiciya tartıw ushın qosımsha imkaniyat jaratatuǵını atap ótildi. Finanslıq birge islesiw perspektivasına ayrıqsha itibar qaratıldı.
Ushırasıw juwmaǵında hár eki tárep sóylesiwdi bekkemlewge, institucionallıq baylanıslardı keńeytiwge, sherikliktiń tiykarǵı baǵdarları boyınsha nátiyjeli málimleme almasıwdı dawam ettiriwge tayar ekenin bildirdi.

ÓzA