Jılıtıw máwsiminde járdemge mútáj shańaraqlardı qollap-quwatlaw jumısları boyınsha ótkerilgen brifingte Sociallıq qorǵaw milliy agentligi Jámiyetshilik penen baylanıslar bóliminiń baslıǵı Dilfuzabegim Rwzmetova ámelge asırılǵan jumıslar haqqında tolıq maǵlıwmat berdi.

Ózbekstanda jılıtıw máwsiminde xalıqtıń járdemge mútáj qatlamın qollap-quwatlaw maqsetinde bir mártelik materiallıq járdem ajıratıw boyınsha keń kólemli jumıslar ámelge asırılmaqta.
Prezidenttiń 2025-jıl 2-apreldegi 134-sanlı qararına muwapıq, 2025/2026-jılǵı jılıtıw máwsiminde hár bir járdemge mútáj shańaraqqa 1 million sum muǵdarında bir mártelik materiallıq járdem beriliwi belgilep qoyılǵan.
Sociallıq qorǵaw milliy agentligi tárepinen 1 million 162 mıńnan aslam járdemge mútáj shańaraqlardıń dizimi qáliplestirildi. Onda tómendegi kategoriyadaǵı shańaraqlar qamtıp alınǵan. “Sociallıq qorǵawdıń birden-bir reestri” hám “Kámbaǵal shańaraqlar reestri”ndegi 822 mıń shańaraq, reestrlerde bolmaǵan, biraq “máhálle jetiligi” tárepinen járdemge mútáj dep tabılǵan qosımsha 290 mıń shańaraq dizimge kirgizilgen.
Qosımsha dizimdi dúziwde ústinlik tómendegi shańaraq kategoriyalarına berildi:
baǵıwshısın joǵaltqan 34 mıń shańaraq, mayıplıǵı bolǵan 76 mıń shańaraq, awır kesel aǵzası bar 24 mıń shańaraq, gaz támiynatı joq kóp qabatlı turaq jaylarda jasaytuǵın 2 mıń shańaraq hám 26 mıń kóp aǵzalı shańaraq.
Sonday-aq, tek ǵana pensiyaǵa jasaytuǵın 69,7 mıń shańaraq, migraciyada bolǵan baǵıwshısı bar 35 mıń shańaraq, waqtınsha jumıssız aǵzası bar 15,2 mıń shańaraq hám 2,3 mıń jalǵız shaxs ta materiallıq járdemge kirgizildi.
Bunnan tısqarı, kámbaǵallıqtan shıqqan, biraq qayta mútáj bolıp qalıw qáwpi joqarı bolǵan 53 mıń shańaraq, sonday-aq, shańaraqlıq balalar úyin ashqan yamasa balalardı patronatqa alǵan 360 shańaraq ta járdem menen támiyinlendi.
Materiallıq járdemniń tiykarǵı maqseti ısıtıw qárejetlerin qaplaw. Máselen, ótken máwsimde kem támiyinlengen shańaraq ortasha 254 kVt elektr hám 514 kub metr gaz paydalanıp, 4 ay dawamında 815 mıń sumǵa shekem qárejet etken. Sol sebepli, 1 million sum muǵdarında járdem muǵdarı belgilendi.
Dizimdi qáliplestiriwde shańaraqlardıń múlki hám ekonomikalıq imkaniyatları málimleme sistemaları arqalı avtomatikalıq túrde bahalandı. Nátiyjede, 99,3 mıń ekonomikalıq jaqtan támiyinlengen shańaraqtıń tiykarsız túrde dizimge kirgiziliwiniń aldı alındı.
Bir mártelik járdem ushın ajıratılǵan 1,2 trillion sum kommerciyalıq banklerge tolıq qaratıldı. 30-oktyabr kúni bank kartasına iye bolǵan puqaralar qarjısın tolıq qabılladı. Plastik kartası joq shańaraqlarǵa bolsa “kóshpeli kassalar” arqalı naq pul tólep berilmekte.
Sonıń menen birge, járdemge mútáj shańaraqlar ushın elektr hám tábiyǵıy gazdi bazalıq normadan artıq tutınıwı boyınsha kompensaciya tólew sisteması jıl dawamında ámel etpekte.
Múrájatlardı jedel sheshiw maqsetinde Agentlik janında 11-40 qısqa nomerli call – oray islep tur.

Sh.Mamaturopova, ÓzA