Áliysher Nawayı atındaǵı Ózbekstan Mámleketlik akademiyalıq úlken teatrında Mahmudxoja Behbudiy tuwılǵanınıń 150 jıllıǵına baǵıshlanǵan ádebiy-kórkem keshe bolıp ótti.

Saltanatlı ilajda dáslep “Mahmudxoja Behbudiy: haqı alınar, berilmes” atamasındaǵı hújjetli film kórsetildi.
Ózbekstan Jazıwshılar awqamınıń baslıǵı, Ózbekstan xalıq shayırı Sirojiddin Sayyid jańa Ózbekstan rawajlanıwǵa bet burǵan búgingi juwapkershilikli processlerde Mahmudxoja Behbudiy miyrasın úyreniw máselesine úlken itibar qaratılıp atırǵanın atap ótti. Bul baǵdarda Prezidentimiz Shavkat Mirziyoevtiń 2024-jıl 27-dekabr kúni qabıl etilgen “Túrkistan jadidlik háreketiniń tiykarın salıwshısı, belgili jazıwshı hám jámiyetlik ǵayratker, baspa xızmetkeri hám pedagog Mahmudxwja Behbudiy tuwılǵanınıń 150 jıllıǵın keńnen belgilew haqqında”ǵı qararı aǵartıwshı babamızdıń ruwxıy miyrasın úyreniwde jańa basqıshtı baslap berdi.
– Mahmudxoja Behbudiy – Túrkstan xalqın erkin hám azat kóriw tileginde jasaǵan, usınday iygilikli maqset jolında janın pidá etken, mártlik tımsalına aylanǵan ólmes tulǵa, – dedi Jazıwshılar awqamınıń baslıǵı Sirojiddin Sayyid. – Awqam tárepinen onıń shıǵarmaların basıp shıǵarıw boyınsha sistemalı jumıslar alıp barıldı.
Mámleketimizdiń barlıq aymaqlarında jadidshilik háreketiniń jarqın wákili ómir jolı, jumısına baǵıshlanǵan ádebiy sáwbetler, ánjumanlar ótkerildi.
Kórkem óner kórgizbeleri shólkemlestirildi. Teatr kórkem óneri boyınsha dramaturglerdiń eń jaqsı shıǵarmaların xoshametlew maqsetinde Mahmudxoja Behbudiy atındaǵı sıylıq shólkemlestirildi.
Bulardıń barlıǵı ullı oyshıl, mámleketlik hám jámiyetlik ǵayratker Behbudiy miyrasın keńirek úyreniw imkaniyatın beredi.
Ádebiy ilajda TÚRKSAY shólkeminiń bas xatkeri Sultan Raev, bir qatar túrkiy mámleketlerdiń ádebiyattanıwshı ilimpazlarınıń Mahmudxoja Behbudiy dóretiwshilik miyrasına baylanıslı pikirleri videobaylanıs arqalı qatnasıwshılar itibarına usınıldı.
Sonıń menen birge, ánjumanda ádebiyattanıwshı ilimpaz, filologiya ilimleriniń doktorı Nurbay Jabborov, Ózbekstan xalıqaralıq islamtanıw akademiyasınıń ilimiy isler boyınsha prorektorı, professor, siyasattanıwshı ilimpaz Ergash Daminovtıń Mahmudxoja Behbudiy dóretiwshilik miyrası, jalınlı jumısı haqqındaǵı bayanatları tıńlandı.
Jazıwshılar awqamınıń jas dóretiwshileri tárepinen Mahmudxoja Behbudiydiń náwqıran áwladqa wásiyatları oqıldı. Aǵartıwshı babamızdıń jumısına baylanıslı spektaklden tásirsheń kórinisler kórsetildi.
Milliy klassikalıq nama-qosıqlar, teatrlastırılǵan kórinisler keshege ózgeshe ruwx baǵıshladı.
Jadidshilik háreketi jetekshisiniń 150 jıllıq tuwılǵan kún sánesine baǵıshlanǵan ádebiy ilajlar mámleketimiz boylap dawam etpekte.

Nazokat USMONOVA, ÓzA