Mámleketimizdiń energetika tarawı sońǵı jıllarda strategiyalıq rawajlanıw hám xalıqaralıq investiciyalardı tartıwda áhmiyetli basqıshqa qádem qoydı. Bul processte “Ózbekneftgaz” AJ akciyaları hám obligaciyalarınıń xalıqaralıq finans bazarlarında jaylastırılıwı ayrıqsha áhmiyetke iye.

Usı jıldıń noyabr ayında abıraylı xalıqaralıq shólkem “Global Banking & Markets” tárepinen ótkerilgen jıllıq konferenciyada “GBM Awards: Central & Eastern Europe”, “Central Asia & Türkiye 2025” sıylıqların tapsırıw máresimi bolıp ótti. Usı máresim sheńberinde “Ózbekneftgaz” AJnıń London fond birjasında 850 million dollarlıq obligaciyalarınıń shıǵarılıwı “Jıl kelisimi” arnawlı sıylıǵı menen sıylıqlandı.
“Ózbekneftgaz” AJ obligaciyalarınıń jaylastırılıwı xalıqaralıq finans bazarlarındaǵı joqarı ózgeriwsheńlik dáwirinde AQSh, Ullı Britaniya, Evropa Awqamı hám Jaqın Shıǵıstıń 100 den aslam iri globallıq investorlardıń itibarın tarttı hám neft-gaz sektorındaǵı usınıstıń ózine tánligi menen ajıralıp turdı.
Qıyın bazar sharayatında ámelge asırılǵan bul tabıslı jaylastırıw kompaniyaǵa investorlar tárepinen bildirilip atırǵan isenimniń ayqın dálili bolıp esaplanadı. Konferenciyada “Standard Chartered”, “J.P. Morgan”, “Citibank hám Deutsche Bank AG” sıyaqlı iri bankler hám finanslıq shólkemler “Ózbekneftgaz” AJǵa hám onıń rawajlanıw perspektivalarına, mámleket tárepinen kórsetilip atırǵan qollap-quwatlaw hám transformaciya processlerine joqarı qızıǵıwshılıq bildirip, óz-ara paydalı birge islesiwdi jáne de bekkemlew tilegin atap ótti.
Energetika ministrligi málimleme xızmetiniń xabarına bola, bul tabıs “Ózbekneftgaz” AJnıń xalıqaralıq kólemdegi abırayın jáne de bekkemlep ǵana qoymastan, al Ózbekstannıń energetika tarawın globallıq finans bazarları aldında isenimli hám turaqlı birge islesiwshi sıpatında tanıtıwda áhmiyetli qádem sıpatında bahalanadı.

N.Ziyodullaeva, ÓzA