Qaraqalpaqstan kórkem óner sarayında «Házirgi qaraqalpaq filologiyasınıń áhmiyetli máseleleri» atamasındaǵı xalıqaralıq ilimiy-ámeliy konferenciya bolıp ótti.

Konferenciya Qaraqalpaq tili hám ádebiyatı qánigeliginiń 90 jıllıǵı múnásibeti menen ótkerildi.
Konferenciyanıń plenar májilisine Qaraqalpaqstan Respublikası Joqarǵı Keńesi hám Ministrler Keńesi, Joqarı bilimlendiriw, ilim hám innovaciyalar ministrligi wákilleri, Rossiya, Túrkiya, Qazaqstan, Qırǵızstan, Túrkmenstansonday-aq, elimizdegi joqarı oqıw orınları, ilimiy-izertlew oraylarınıń ilimpazları, jazıwshı-shayırlar, professor-oqıtıwshılar, studentler, keń jámiyetshilik hám ǵalaba xabar qurallarınıń wákilleri qatnastı.
Konferenciyada Qaraqalpaqstan Respublikası Joqarǵı Keńesiniń komitet baslıǵı Murat Atamuratov shıǵıp sóylep, ilaj qatnasıwshıların Qaraqalpaq tili hám ádebiyatı 90 jıl tolıwı menen qutlıqladı hám usı konferenciyada belsendilik kórsetken bir qatar professor-oqıtıwshılarǵa Húrmet jarlıqlar hám estelik sawǵalar tapsırdı.
Bunnan soń Ózbekstan Jazıwshılar awqamınıń bólim baslıǵı, Qaraqalpaqstan xalıq shayırı Rustam Musırman, Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı Keńesbay Karimov ilaj qatnasıwshıların belgilenip atırǵan qutlı sáne menen qutlıqlap, Berdaq atındaǵı Qaraqalpaq mámleketlik universiteti qaraqalpaq filologiyası hám jurnalistika qánigeliniń búgingi kúni respublikamız bilimlendiriwi, ilimi, ádebiyatı hám jurnalistikasındaǵı tutqan ornına joqarı baha berdi.
Bunnan soń QMUdıń qaraqalpaq ádebiyatı kafedrası professorı Quwanıshbay Orazımbetov «Qaraqalpaq filologiyası hám joqarı bilimlendiriw sisteması», Qırǵız Respublikası Prezidenti janındaǵı Sh.Aytmatov atındaǵı til hám ádebiyatı institutı direktorı, akademik Abdıldajan Akmataliev «Qaraqalpaq – Qırǵız ádebiy baylanısları ilimpazlar izertlewlerinde» degen temalarda bayanatlar jasap, házirgi qaraqalpaq filologiyasınıń áhmiyetli máseleleri, qaraqalpaq-qırǵız ádebiiy baylanıslarınıń áhmiyeti, házirgi dáwirde bilimlendiriw tarawına kadrlar tayarlap beriwdiń baslı baǵdarları haqqında keń túrde aytıp berdi.
Konferenciyada qaraqalpaq filologiyasınıń tariyxıy rawajlanıwı, zamanagóy til bilimi hám ádebiyattanıwdaǵı áhmiyetli máseleler, milliy ádebiy miyrastı úyreniw, innovaciyalıq qatnaslar tiykarında filolog qánigelerdi tayarlaw procesindegi jańalıqlar sıyaqlı temalarda ilimpazlardıń ilimiy bayanatlar tıńlanıp, qaraqalpaq tili hám ádebiyatınıń rawajlanıwı boyınsha aldaǵı wazıypalar dodalandı.
Konferenciyanıń tiykarǵı bóliminen soń ilaj qatnasıwshılarına qaraqalpaq xalqınıń bay mádeniyatı, klassikalıq hám zamanagóy kórkem óneri, elimiz dóretiwshileriniń saxnalıq shıǵıwların ózinde jámlegen koncert baǵdarlaması qoyıp berildi. Kórkem óner baǵdarlamasında qaraqalpaq ádebiyatı úlgilerinen ádebiy oqıwlar, nama-qosıqlar, folklor jámáátleriniń shıǵıwları tamashagóylerge bayram keypiyatın baǵıshladı.
Ótkerilgen ilimiy-ámeliy konferenciya qaraqalpaq filologiyası qánigeliginiń 90 jıllıq tariyxı sıpatında belgilenip qalmastan, al filologiya tarawınıń rawajlanıwına jańa túrtki berip, ilim, bilimlendiriw hám mádeniyatlar qarım-qatnasınıń ayqın úlgisine aylandı.

Qaraqalpaqstan xabar agentligi