Qaraqalpaqstan Respublikasınıń «Mámleketlik til haqqında»ǵı nızamı qabıl etilgenine 36 jıl tolıwı múnásibeti menen Ózbekstan mámleketlik denetárbiyası hám sport universiteti Nókis filialında «Mártebeń bálent bolsın ana tilim!» atamasında bayram keshesi boldı.

Ilajda filial direktorı, professor B.Erimbetov jıynalǵanlardı bayram menen qutlıqladı hám qaraqalpaq tiliniń turmısımızda tutqan ornına ayrıqsha toqtap ótti.
Bunnan soń shıǵıp sóylegen bayanatshılar ana tildiń qarım-qatnas quralı bolıwı menen birge, neshe ásirler dawamında óziniń qádir-qımbatın joytpay, biz áwladlarǵa shekem jetip kelgen biybaha ǵáziyne ekenligin, hár bir xalıqtıń ózine tán ózgesheligin, rawajlanıw basqıshların hám keleshegin belgilewde ana tiliniń tutqan ornı ayrıqsha ekenligin ayrıqsha atap ótti.
Ótkerilgen ilaj dawamında 1-dekabr – Qaraqalpaq tiline mámleketlik til biyligi berilgeniniń 36 jıllıǵı múnásibeti menen studentler arasında ótkerilgen dóretiwshilik tańlaw hám sporttıń futbol túri boyınsha shólkemlestirilgen «Direktor kubogi» jarısınıń jeńimpazlarına shólkemlestiriwshiler tárepinen tayarlanǵan arnawlı diplom, kubok hám estelik sawǵaları tapsırıldı.
Bayram ilajı filial studentleri tárepinen tayarlanǵan koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshı