Ózbekstan Respublikası Prezidentiniń biyligi

Mámleketlik xızmetlerdi kórsetiw basqıshların optimallastırıw, fizikalıq hám yuridikalıq táreplerge artıqsha minnetlemeler júkleniwiniń aldın alıw, mámleketlik shólkemler, xalıq hám biznes arasında sanlı qarım-qatnastı tolıq jolǵa qoyıw hám bul baǵdardaǵı reformalardıń nátiyjeliligin arttırıw maqsetinde qarar etemen:
1. 2026-jıl 1-yanvardan baslap mámleketlik basqarıwdı sanlı transformaciyalaw hám nátiyjeliligin arttırıwǵa qaratılǵan “Byurokratiyanı saplastırıw – 2030” baǵdarlaması (keyingi orınlarda – Baǵdarlama) iske qosılsın hám tómendegiler onıń tiykarǵı wazıypaları etip belgilensin:
(a) mámleketlik xızmetlerden tez hám qolaylı paydalanıw arqalı puqaralardıń turmıs sapasın jaqsılaw;
(b) isbilermenlikti xoshametlew, mámlekettiń sırt el investiciyaları ushın tartımlılıǵın arttırıw;
(v) sanlı basqarıw hám mámleketlik basqarıw tarawlarında mámleketimizdiń unamlı imidjin qáliplestiriw;
(g) artıqsha tártip-qaǵıydalardı saplastırıw hám processlerdiń ashıq-aydınlıǵın arttırıw arqalı qáwip-qáterdi azaytıw.
2. Baǵdarlamanıń ámelge asırılıwın muwapıqlastırıw maqsetinde Strategiyalıq rawajlanıw hám reformalar agentligi (keyingi orınlarda – Agentlik) janında Joybarlaw ofisi (keyingi orınlarda – Joybarlaw ofisi) shólkemlestirilsin hám tómendegiler onıń tiykarǵı wazıypaları etip belgilensin:
(a) Baǵdarlamanı tabıslı ámelge asırıw máseleleri boyınsha sırt mámleketler hám xalıqaralıq shólkemler menen birge islesiwdi jolǵa qoyıw;
(b) Baǵdarlama sheńberinde ámelge asırılatuǵın ilajlar boyınsha “jol kartası”n islep shıǵıw hám tastıyıqlaw ushın Ózbekstan Respublikası Prezidenti janındaǵı Strategiyalıq rejelestiriw hám rawajlanıw boyınsha muwapıqlastırıwshı keńeske kirgiziw;
(v) hár jıldıń juwmaǵında ministrlikler hám uyımlar, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri (keyingi orınlarda – mámleketlik shólkemler) tárepinen mámleketlik basqarıwda byurokratiyanı saplastırıw boyınsha ámelge asırılǵan jumıslardıń nátiyjeliligin bahalaw, járiyalaw jáne mámleketlik shólkemler hám intakerlerdi xoshametlew boyınsha Ózbekstan Respublikası Prezidentine málimleme kirgiziw.
3. Sonday tártip ornatılsın, byurokratiyanı saplastırıw boyınsha usınıslardı islep shıǵıw hám kórip shıǵıw, bul baǵdarda ámelge asırılǵan jumıslardıń nátiyjeliligin bahalaw Agentliktiń operatorı hám múlk iesi esaplanatuǵın “Zero Bureaucracy” sanlı platforması arqalı ámelge asırıladı.
4. Baǵdarlama sheńberinde belgilengen ilajlardıń óz waqtında hám nátiyjeli ámelge asırılıwın támiyinlew jáne anıq nátiyjelerge erisiw ushın mámleketlik shólkemlerdiń birinshi basshıları jeke juwapker ekenligi kórsetip ótilsin.
5. Agentlik bir ay múddette:
(a) Joybarlaw ofisiniń jumısı jolǵa qoyılıwı ushın zárúr shólkemlestiriw ilajların ámelge asırsın;
(b) “Byurokratiyanı saplastırıw” milliy sıylıǵı tańlawın ótkeriw reglamentiniń joybarın Ózbekstan Respublikası Prezidenti Administraciyasına kirgizsin. Onda usı tańlawdı hár jılı ótkerip barıw názerde tutılsın;
(v) Sanlı texnologiyalar ministrligi menen birgelikte
“Zero Bureaucracy” sanlı platforması iske qosılıwın hám turaqlı jańalanıp barılıwın támiyinlesin.
6. Biyliktiń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikası Prezidentiniń keńesgóyi S.U. Umurzakovqa júklensin.

Ózbekstan Respublikası Prezidenti Sh.Mirziyoev