2025-jıl 25-27-noyabr kúnleri Oliy Majlis Senatı Baslıǵınıń birinshi orınbasarı Sodiq Safoev basshılıǵındaǵı Ózbekstan delegaciyasınıń Kanadaǵa rásmiy saparı ámelge asırıldı.

Sapar etiw dawamında Ózbekstan delegaciyasınıń nátiyjeli ushırasıwları bolıp ótti. Sonıń ishinde, delegaciya Kanada Senatınıń Spikeri Raymond Gane menen ushırasıp, eki mámleket parlamentleri arasında turaqlı sóylesiwdi jolǵa qoyıw, birge islesiwdi sistemalı túrde keńeytiw hám birgeliktegi baslamalardı alǵa qoyıw máselelerin dodaladı.
Sonday-aq, senatorlar S.Ataullaxjan hám M.Ravalia menen bolıp ótken ushırasıwda parlament diplomatiyası, insan huqıqları, gender teńlik, migraciya hám qáwipsizlik máseleleri boyınsha tájiriybe almasıw perspektivaları kórip shıǵıldı.
Bunnan tısqarı, delegaciya Kanada parlamenti Jámáátler palatasınıń Spikeri F.Skarpaledja menen de ushırasıp, Ózbekstan hám Kanada arasında parlamentlerdiń tómengi palataları dárejesinde sistemalı baylanıslardı jolǵa qoyıw, nızamshılıq tarawında tájiriybe almasıw hám birgeliktegi ekspertler sóylesiwin shólkemlestiriw boyınsha pikir alısıldı.
Kanada parlamentinde shólkemlestirilgen “Ózbekstan kúni” ilajı qatnasıwshılardıń úlken qızıǵıwshılıǵı menen ótti. Ózbekstan delegaciyası tárepinen mámleketimizde ámelge asırılıp atırǵan ekonomikalıq reformalar, investiciyalıq ortalıqtaǵı ózgerisler, hayal-qızlar hám jaslardı qollap-quwatlaw siyasatı, jasıl energetika hám innovaciyalar baǵdarındaǵı jańa baslamalar haqqında tolıq maǵlıwmat berildi.
Kanada parlamenti aǵzaları Ózbekstannıń keyingi jıllarda erisken jetiskenliklerin joqarı bahalap, eki mámleket arasındaǵı doslıq hám birge islesiwdi bunnan bılay da bekkemlewge tayar ekenin bildirdi.
27-noyabr kúni delegaciya Toronto qalasında jumıs alıp barıp atırǵan bir qatar shólkemlerde ushırasıwlar ótkerdi. Ontario universitetleri keńesiniń prezidenti S.Orsini menen bolıp ótken sóylesiwler dawamında Ózbekstan hám Kanada joqarı bilimlendiriw mákemeleri tárepinen birgeliktegi bilimlendiriw baǵdarlamaların jolǵa qoyıw, oqıtıwshılar hám studentler almasıwın keńeytiw, ilimiy-izertlew joybarların qollap-quwatlaw máseleleri kórip shıǵıldı.
“Vector Institute” basshıları menen ushırasıwda jasalma intellekt, maǵlıwmatlar analitikası, kiberqáwipsizlik, IT-bilimlendiriw hám innovaciyalıq izertlewler boyınsha birge islesiw, ózbekstanlı jaslardı zamanagóy texnologiyalar tarawına tartıw boyınsha anıq usınıslar islep shıǵıldı.
Bunnan tısqarı, delegaciya Kanadada jasap atırǵan watanlaslar, jaslar hám studentler menen ushırasıp, olardıń pikir-usınısların tıńladı, mámleketimizde ámelge asırılıp atırǵan reformalar, xalıqaralıq birge islesiw siyasatı, watanlaslar menen islesiw procesi haqqında tolıq maǵlıwmat berdi hám olar tárepinen bildirilgen usınıslardı dodaladı.

Qaraqalpaqstan xabar agentligi