Ózbekstan Respublikası Prezidenti Shavkat Mirziyoev 28-noyabr kúni Birlesken Arab Ámirlikleri Húkimet isleri boyınsha ministri Muhammad bin Abdulloh al-Gargaviy basshılıǵındaǵı delegaciyanı qabılladı.

Ushırasıw aldınan ministr mámleketimiz basshısına BAÁ Prezidenti Shayx Muhammad Ol Nahayan hám mámleket Vice-prezidenti, Bas ministri, Dubay ámiri Shayx Muhammad Ol Maktumnıń qızǵın sálemin hám eń jaqsı tileklerin jetkerdi.
Ózbekstan – BAÁ doslıǵı hám strategiyalıq sherikligin jáne de bekkemlew, sonday-aq, usı jıldıń yanvar ayında BAÁǵa ámelge asırılǵan joqarı dárejedegi sapar dawamında erisilgen kelisimlerdi ámelge asırıw máseleleri dodalandı.
Keyingi jılları BAÁ húkimeti menen 40 tan aslam baǵdarlarda 300 den aslam baslamalar, sonıń ishinde, “Húkimet akseleratorı,” “Bir million programmist” hám “Jas jetekshiler” sıyaqlı áhmiyetli baǵdarlamalar ámelge asırılǵanı úlken qanaatlanıwshılıq penen atap ótildi.
Mámleketlik basqarıw nátiyjeliligin arttırıw tarawında óz-ara paydalı birge islesiw boyınsha qabıl etilip atırǵan jańa bes jıllıq baǵdarlamanı keń kólemde ámelge asırıw zárúrligi atap ótildi.
Byurokratiyanı azaytıw, jasalma intellekt tarawında 5 million prompt-injenerdi oqıtıwda BAÁniń aldınǵı tájiriybesin engiziw hám “Jas áwlad” hám “Kitap chellenji” joybarların jolǵa qoyıw boyınsha birge islesiw rejelerine ayrıqsha itibar qaratıldı.
Sonday-aq, bolajaq joqarı dárejedegi ilajlarǵa puqta tayarlıq kóriwge kelisip alındı.

ÓzA