Shaxmat boyınsha Jáhán kubogin qolǵa kirgizip, Ózbekstan jaslarınıń intellektuallıq potencialı qanshelli joqarı ekenin kórsetken Javohir Sindorov saltanatlı kútip alındı.

Mámleketimizdiń jámiyetlik-siyasiy sistemasında jańa Ózbekstan principiniń keńnen engiziliwi xalqımızdıń turmısına umtılıwshańlıq, issheńlik, talpınıs sezimlerin sińdirdi.
Bul, óz gezeginde, maqtanıshımızdı arttıratuǵın tabıslardıń salmaǵı jıldan-jılǵa artıp barıwına sebep bolmaqta. Ásirese, keyingi 5 jıl dawamında sport tarawında qolǵa kirgizilgen nátiyjeler, erisilgen jeńisler sonshelli dárejede arttı, bul jańalıqlar xalqımızdıń turmısında, Watanımızdıń xalıqaralıq maydandaǵı abıray-mártebesiniń joqarılawında, salamatlıq háreketiniń keńnen en jayıwında úlken áhmiyetke iye bolmaqta.
Bunnan bir neshe hápte burın elimiz sportshılarınıń “Islam tileklesligi” oyınlarında 57 mámleket delegaciyaları arasında hám onnan aldınıraq Baxreynde ótkerilgen jaslar arasındaǵı Aziya oyınlarında ulıwma komandada 2-orındı iyelegeninen soń kúni keshe Hindstanda shaxmatshımız Javohir Sindorovtıń Jáhán kuboginiń iyesi bolıwı Ózbekistan jaslarınıń jeńimpazlıq kórinisi qanshelli joqarı ekenin dúnya xalqına jáne bir márte ayqın kórsetti.
Ómirimizde áhmiyetli kúnler, sáneler kóp. Biraq Watanımız keleshegi jolında ámelge asırılıp atırǵan jumıslar, onıń irge tası qoyılǵan demler hámmesinen qádirli.
Usı mánide, 2025-jıldıń 26-noyabr kúni tek ǵana sportımız emes, al elimizdiń erteńgi rawajlanıwı jolındaǵı eń este qalarlıq kúnlerden biri bolıp qalatuǵını sózsiz.
Áyne usı kúni Ózbekstanda mámleketimiz basshısınıń baslaması menen Prezidentlik olimpiada oyınlarınıń ótkeriliwi rásmiy túrde jolǵa qoyılǵanı járiyalanǵan bolsa, erteńimiz iyeleri jaslardıń intellektuallıq potencialı qanshelli joqarı ekenin kórsetken Javohir Sindorov qıtaylı Vey Ini 1,5:0,5 esabında jeńip, jáhán kubogin qolǵa kirgizdi.
Xalıqaralıq shaxmat áleminde úlken shawqımǵa sebep bolǵan, FIDE tariyxında eń jas jáhán kuboginiń iyesi sıpatında tán alınǵan 19 jasar Javohir Sindorov Islam Kárimov atındaǵı Tashkent xalıqaralıq aeroportında húkimet aǵzaları, sportımız juwapkerleri, keń jámiyetshilik wákilleri, shaxmat ıqlasbentleriniń qatnasıwında saltanatlı kútip alındı.
Haqıyqatında da, Javohir Sindorov dúnyanıń eń kúshli 206 shaxmatshısı menen qıyın hám úlken ruwxıy basım astında ótken abıraylı jarısta oǵada isenimli, salmaqlılıq penen joqarı erk-ıqrar hám mártligin kórsetti, hár bir tur, hár bir ilgeriletiw onı jeńiske jetekledi.
Gao qalasında jáhán kubogi jeńimpazı Javohir Sindorovtı rásmiy sıylıqlaw máresiminde qatnasqan Xalıqaralıq shaxmat federaciyasınıń basshıları, Hindstan sport shólkemleriniń juwapkerleri Ózbek shaxmatınıń rawajlanıw dinamikası haqqında jıllı pikirler bildiriw tiykarında Prezidentimiz Shavkat Mirziyoevtiń jas shaxmatshımızdı hám jáhán kubogi qatnasıwshıların qutlıqlaǵanı itibarlı waqıya boldı.
– Jáhán kubogin qolǵa kirgiziwim, shaxmat tajı ushın kelesi jılı Kiprde bolatuǵın Talabanlar turnirine jollama alǵanımnan quwanıshlıman. Jeńiske eriskenimnen soń húrmetli Prezidentimiz Shavkat Mirziyoevtiń jeke ózi telefon etip qutlıqlaǵanı hám bul qutlıqlaw Hindstanda sıylıqlaw máresiminde hámmege kórsetilgeni ómirimdegi eń umıtılmas waqıya bolıp qaladı. Bul abıraylı jarıstıń Hindstanda ótkerilgeni meniń sport jumısımda ayrıqsha orın iyeleydi. Sebebi, birinshi márte 7 jasımda birinshi Aziya chempionlıǵına Hindstan jerinde eriskenmen. Bunnan soń, 2022-jılı CHennayda ótken Pútkiljáhán shaxmat olimpiadasında komandamız benen jeńimpazlıqtı qolǵa kirgizdik. Elimiz sportınıń úlken jetiskenlikleri ele aldında, dep oylayman. Bar kúsh-ǵayratım, bilimim menen Watanımızdıń dańqın, onıń abırayın arttırıwǵa háreket etemen, – dedi kútip alıw máresiminde J.Sindorov.
Dúnya xalqına Ózbek shaxmatınıń ruwxıy kúshin, mámleketimiz jaslarınıń oy-pikiriniń qanshelli joqarılıǵın kórsetken shaxmatshılarımızdı kútip alıw máresiminde Ózbekstan Respublikası Prezidentiniń Javohir Sindorovqa “Ózbekstan Respublikasına xızmet kórsetken sportshı” húrmetli ataǵın beriw haqqındaǵı pármanı oqıp esittirildi.
Kútip alıw máresiminde Ózbekstan Respublikası Bas ministri A.Aripov qatnastı.

T.RWZIEV,
ÓzAnıń xabarshısı