27-noyabr kúni mámleketimizge jańadan tayınlanǵan sırt el elshileri tárepinen isenim jarlıqların tapsırıwǵa baǵıshlanǵan saltanatlı máresim bolıp ótti.

Ózbekstan Respublikası Prezidenti Shavkat Mirziyoev ayrıqsha hám tolıq huqıqlı elshiler – Greciya Respublikasınan Paraskevi Ceveleki, Indoneziya Respublikasınan Siti Ruhayni Juxayatin, Latviya Respublikasınan Girts Yaunzems, Franciya Respublikasınan Valid Fuk, Rossiya Federaciyasınan Aleksey Erxov, Yaponiyadan Kendzi Xirata hám Tájikstan Respublikasınan Nasriddin Ismatulladan isenim jarlıqların qabıl etti.
Mámleketimiz basshısı Jańa Ózbekstanda óz missiyasın baslap atırǵan diplomatiyalıq wákilxanalardıń basshıların qızǵın qutlıqladı.
Házirgi turaqsız dáwirde, pútkil dúnyada qıyın geosiyasiy hám ekonomikalıq mashqalalar keskinlesip atırǵan bir waqıtta diplomatlardıń jumısı barǵan sayın úlken áhmiyetke iye ekeni atap ótildi.
– Sizler bir neshe aydan berli elimizde bolıp, búgingi kúnde mámleketimiz qanday jedel ózgerisler ruwxı menen jasap atırǵanına hám dúnya diplomatiya oraylarınan birine aylanıp baratırǵanına jeke gúwa bolmaqtasız, – dedi Prezidentimiz.
Atap aytqanda, usı jılı Tashkent xalıqaralıq investiciyalıq forumı hám Sırt el investorları keńesiniń májilisi, Parlamentleraralıq awqamnıń 150-yubiley assambleyası, “Oraylıq Aziya – Evropa Awqamı” birinshi sammiti hám Xalıqaralıq klimat forumı, YuNESKO Bas konferenciyasınıń tariyxıy sessiyası jáne Oraylıq Aziya mámleketleri basshılarınıń sammiti tabıslı ótkerildi.
Keyingi jılları Ózbekstannıń baslaması menen BMSh Bas Assambleyasınıń 13 rezolyuciyası qabıl etildi.
Bıyıl mámleketimiz Globallıq turaqlı rawajlanıw maqsetleri indeksinde 19 tekshege kóterildi hám sońǵı 10 jıl ishinde eń joqarı nátiyjelerge erisken bes mámleket qatarına kirdi. Keyingi segiz jılda ekonomikamız eki eseden zıyatqa arttı. Kámbaǵallıq dárejesi 35 procentten 6,6 procentke shekem tómenledi.
Ashıq-aydınlıq siyasatı nátiyjesinde derlik 100 mámleket ushın vizasız rejim engizildi. Eksport geografiyası turaqlı túrde keńeyip barmaqta. Bıyıl sırtqı sawda aylanısı tariyxta birinshi márte 66 milliard dollardan astı. Tartılǵan sırt el investiciyalarınıń kólemi 39 milliard dollarǵa jetti.
Mámleketimiz basshısı, sonday-aq, Ózbekstannıń Jáhán sawda shólkemine aǵza bolıwın belsene qollap-quwatlaǵanı ushın elshiler wákillik etip atırǵan mámleketlerdiń húkimetlerine ayrıqsha minnetdarshılıq bildirdi.
Prezidentimiz Greciya Respublikası elshisine múrájat etip, bul mámleket Ózbekstannıń Evropa Awqamındaǵı dástúriy hám perspektivalı sheriklerinen biri ekenin atap ótti.
Usı jılı eki tárepleme siyasiy másláhátlesiwler tabıslı ótkerildi. Aprel ayında Tashkentte Greciya elshixanası óz jumısın basladı.
Jıl basınan berli óz-ara sawda kólemi 5 esege arttı. Farmacevtika, jeńil hám azıq-awqat sanaatı, energetika, málimleme texnologiyaları hám transport tarawlarında birge islesiwdi rawajlandırıw áhmiyetli ekenligi atap ótildi.
Jaqın arada Tashkentte ótkeriliwi rejelestirilgen Húkimetleraralıq komissiya májilisi hám Ózbekstan – Greciya biznes forumınıń nátiyjeli bolıwın támiyinlew zárúr ekenligi atap ótildi.
Indoneziya Respublikası menen qatnasıqlar haqqında sóz etip, Prezidentimiz xalıqlarımızdı ázelden tariyxıy, diniy hám mádeniy baylanıslar baylanıstırıp turǵanın atap ótti.
Eki mámleket arasındaǵı tovar almasıw kólemi jıl basınan 60 procentke artqanı atap ótildi. Ximiya sanaatı, awıl xojalıǵı, telekommunikaciya hám turizm tarawlarında qospa kárxanalar tabıslı jumıs alıp barmaqta. Dekabr ayında tikkeley aviareysler jolǵa qoyıladı.
Kelesi jılı Tashkentte Húkimetleraralıq komissiya májilisi hám biznes forumı jáne Jakartada siyasiy másláhátlesiwler ótkeriliwi salmaqlı nátiyje beretuǵınına isenim bildirildi.
Mámleketimiz basshısı Latviya Respublikası menen qatnasıqlardı dodalaw waqtında siyasiy hám ekonomikalıq baylanıslar izbe-iz rawajlanıp atırǵanı, isbilermen toparlar arasındaǵı baylanıslar jedelleskenin atap ótti.
Sońǵı 5 jıl ishinde Ózbekstannıń Latviyaǵa eksportı hám qospa kárxanalardıń sanı úsh esege arttı. Mámleketimizde Latviya Investiciyalar hám rawajlanıw agentliginiń wákilxanası jumıs alıp barmaqta.
Jaqında Rigada Ózbekstan mádeniyatı kúnleri hám Rektorlar forumı tabıslı ótkerildi.
Migraciya tarawında kelisimge qol qoyılıwı, aviaqatnawlardıń kóbeyiwi hám ekonomikalıq birge islesiw mexanizmlerinen nátiyjeli paydalanıw eki mámleket xalıqlarınıń jáne de jaqınlasıwına xızmet etetuǵını atap ótildi.
Prezidentimiz Franciya Respublikası haqqında sóz etip, jedel siyasiy sóylesiw sebepli mámleketlerimiz arasındaǵı qatnasıqlar strategiyalıq sheriklik dárejesine kóterilgenin atap ótti. Ótken ayda Strategiyalıq rejelestiriw toparınıń birinshi májilisi bolıp ótti.
Usı jıldıń mart ayında Parijge ámelge asırılǵan joqarı dárejedegi tariyxıy sapar dawamında 10 milliard dollarlıq birgeliktegi joybarlar boyınsha kelisip alındı. Jıl basınan óz-ara sawda kólemi 1,2 milliard dollardan arttı.
Franciya rawajlanıw agentligi menen 2030-jılǵa shekem birge islesiw baǵdarlaması tastıyıqlandı. Ózbekstan – Franciya birgeliktegi universiteti ashıldı.
Bıyıl Parijde bolıp ótken Ózbekstan mádeniyatı kúnleri hám turizm potencialı kórgizbesi xalıqlarımız arasındaǵı qatnasıqlardı jáne de bekkemlewge xızmet etti.
Kelesi jılı Ózbekstan – Franciya investiciya keńesiniń birinshi májilisi hám Aymaqlararalıq forumdı ótkeriw zárúr ekenligi atap ótildi.
Rossiya Federaciyası – Ózbekstannıń uzaq jıllıq strategiyalıq sherigi hám awqamlası.
Ótken jılı óz-ara sawda kólemi 12 milliard dollarǵa shamalastı. Elimizde Rossiya investiciyasınıń qatnasıwında 3 mıńnan aslam kárxana jumıs alıp barmaqta. Jıl basınan berli 4 milliard dollarlıq investiciyalar ózlestirildi. Rossiyanıń 15 joqarı bilimlendiriw mákemesiniń filialları nátiyjeli jumıs alıp barmaqta.
Bıyıl Parlamentleraralıq komissiyanıń májilisi, “INNOPROM” xalıqaralıq sanaat kórgizbesi, Aymaqlar basshıları keńesi, siyasiy másláhátlesiwler, Rektorlar forumı, Rossiya mádeniyatı kúnleri hám basqa da ilajlar ótkerildi.
Kelesi jılı Ózbekstan – Franciya investiciya keńesiniń birinshi májilisi hám Aymaqlararalıq forumdı ótkeriw zárúr ekenligi atap ótildi.
Rossiya Federaciyası – Ózbekstannıń uzaq jıllıq strategiyalıq sherigi hám awqamlası.
Ótken jılı óz-ara sawda kólemi 12 milliard dollarǵa shamalastı. Elimizde Rossiya investiciyasınıń qatnasıwında 3 mıńnan aslam kárxana jumıs alıp barmaqta. Jıl basınan berli 4 milliard dollarlıq investiciyalar ózlestirildi. Rossiyanıń 15 joqarı bilimlendiriw mákemesiniń filialları nátiyjeli jumıs alıp barmaqta.
Bıyıl Parlamentleraralıq komissiyanıń májilisi, “INNOPROM” xalıqaralıq sanaat kórgizbesi, Aymaqlar basshıları keńesi, siyasiy másláhátlesiwler, Rektorlar forumı, Rossiya mádeniyatı kúnleri hám basqa da ilajlar ótkerildi.
Ekonomikalıq birge islesiw boyınsha húkimetleraralıq komissiyanıń májilisin nátiyjeli ótkeriw, aymaqlararalıq sóylesiwdi jedellestiriw áhmiyetli ekenligi atap ótildi.
Yaponiya menen strategiyalıq sheriklikti keńeytiw – sırtqı siyasatımızdıń tiykarǵı baǵdarlarınan biri.
Ózbekstanda Yaponiya xalıqaralıq birge islesiw agentligi (JICA), Yaponiya sırtqı sawda shólkemi (JETRO) hám Nagoya universitetiniń wákilxanaları nátiyjeli jumıs alıp barmaqta.
Telekommunikaciya, energetika, densawlıqtı saqlaw, infrastrukturanı rawajlandırıw, bilimlendiriw hám turizm tarawlarında 8 milliard dollarlıq joybarlar ámelge asırılmaqta.
Strategiyalıq sóylesiwdiń birinshi májilisi avgust ayında, ótken ayda bolsa Samarqandta Rektorlar forumı bolıp ótti. Osaka qalasında ” Expo – 2025″ kórgizbesi sheńberinde Ózbekstan Milliy kúni tabıslı shólkemlestirildi.
Kelesi ayda Tokioda bolıp ótetuǵın joqarı dárejedegi sóylesiwler hám isbilermen toparlardıń sóylesiwleri eki tárepleme birge islesiwge jańa pát baǵıshlaytuǵınına isenim bildirildi.
Ulıwma siyasiy erk-ıqrar sebepli keyingi jıllarda Ózbekstan – Tájikstan qatnasıqları strategiyalıq sheriklik hám awqamlaslıq dárejesine kóterildi.
Shegara máseleleri tolıq tártipke salındı hám transport baylanısları tiklendi. Parlamentler, húkimetler, aymaqlar hám isbilermen toparlar arasındaǵı birge islesiw kúsheydi.
Óz-ara sawda 5 eseden artıp, 1 milliard dollarǵa shamalastı. “Oybek-Fotexobod” erkin shegaraaldı sawda zonası hám “Andarxan” sawda-logistika orayınıń shólkemlestiriliwi tovar almasıwdı esesine arttırıwǵa xızmet etetuǵını atap ótildi.
Sanaat, transport, geologiya, energetika, awıl hám suw xojalıǵı, turizm, bilimlendiriw hám mádeniyat tarawlarında birgeliktegi joybarlardı ámelge asırıw ushın potencial bar ekenligi atap ótildi.
Máresim juwmaǵında mámleketimiz basshısı jańadan tayınlanǵan elshilerge maqtanıshlı jumısında úlken tabıslar tiledi, birge islesiwdi bekkemlew ushın barlıq imkaniyatlardan nátiyjeli paydalanıwǵa shaqırdı, aymaqlar hám jeke menshik sektor wákilleri menen belsene birge islesiwdi usınıs etti.
Óz gezeginde, sırt elli diplomatlar shın júrekten qabıllaǵanı hám jaratılǵan sharayatlar ushın minnetdarshılıq bildirip, Ózbekstan menen kóp qırlı birge islesiwdi jedel rawajlandırıw ushın professional tájiriybesin hám bilimlerin tolıq jumsawǵa tayar ekenligin atap ótti.

ÓzA